نصايح اقدمها لكم اخواتي في مطبخ النايرات

هذه نصايح اقدمها لكم اخواتي في مطبخ النايرات وديمه مجيهات وان شاءالله الكل يستفيد منها

كنته بواجه مشكله شرب الزيت لللقيمات وعرفته من صديقه انو ملعقه نشاء او كستر ما بتخلى القيمات تشرب الزيت ومن اليوم داك ما استغنيت عنها
اى وصفة معجنات ختى فيها زبادى وانسى الطعم

الرز عشان يكون مفلفل وطاعم بخت عليهو الملح اثناء ما بقلبو في حبة زيت قبل ما اغطيهو بالموية.
الطلح المنقوع في موية قرنفل ومحلب مسحونين .وشوية كركم .مبالغة
ومكن كمان بعد تتبلى الدجاج تجيبى ملعقتين نشاء وملعقتين دقيق وتختى الدجاج فيهم قبل التحمير يطلع ناااشف وحلو زى بتاع المحلات
ممكن نعمل مزيل للعرق بدل نشتري مزيل وكلنا عارفين انوا في مزيلات بتحتوي علي الكحول والكحول بسبب سرطان للسيدات عشان كدا لازم نحرص علي شرا مزيل خالي من الكحول ( سرطان التدي ) حمنا

الله واياكم
نعمل مزيل بتكون من شويه شب مسحون ملعقه نبلوا بي ملعقتين مويه لحدي مايذوب نصفي بي قطعه شاش ونضيف علي ملعقه نشا ابيض وملعقه مسك وملعقه كريم غير دهني اكون وشويه رشه من عطرك المفضل
طلعي الكيس حق المكنسة الكهربائية الجوة وغسليهو بالكومفورت او الداوني وكلما اشتغلت بتدي ريحة حلوة
.
النشادر بالصلصه ...للحنه سواااد مبالغه...بشكر ست الوصفه..
بمسح الموكيت كل يومين تﻻته بي فوطه كبيرة الفها في المساحه مبلوله في الخلطه دي

( عمﻻق ..كلوركس...صابون بدرة..) ...

بتدي ريحه ونضافه عجيبه..تحسي نفسك مرتاحه نفسيا....
بعد البخور برش معطر الفرش او عطر..اي كان ..بخلي الريحه تجججنن...
لو عندك بلكونة ختي اي اناء وكبي جواهو موية للعصافير عشان تشرب وفي كل كبد رطبة اجر
الشاي عشان مايفور ختي ملعقة بالعرض فوق الاناء ماحيتدفق فوق البوتجاز
لما تولعي البخور افتحي المكيف بيسحب ريحه البخور خاص في غرف الضيوف لو جاكي ضيف فجأة اول ماتفتحي المكيف المكان بيتعطر

تسيحي مسك في نار هادية وتكبي عليه شوية صندلية وتطفي النار وتديه ملعقتين جليسوليد او فازلين وممكن شوية مسك ابيض سائل رهيييييبة للمناطق الحساسة لليوم التاني ما بتطلع
البيض لمن نسلقو نحط ملعقة خل عشان القدر ما يتغير لونو

بعد نظافة البوتوجاز تمسحي بي زيت أطفال مابخلي البقع تمسك
لعواسة الكسرة بدل تمسحي الصاج بعد كل طرقة ماعليك الا تكبي زيت في العجين نفسه بدل تمسحي بقطعة فيها زيت كل مرة

الفول لمن تجي تشدي كبي حبة عدس وبصله ومعلقه باكنج بودر وحبة زيت ووطي النار بيطلع زي الزبده
فى الكفته الناس البتستعمل الشوفان لما يتسحن تطلع الكفته رهههههيبه احسن من لما نعملو من غير سحن

لحفظ النعناع لمدة اطول في التلاجة من غير ما يبوظ : اولا ننظفه من الاوراق الخربانة ونغسله كويس ونجففه علي خفيف يعني نمسك الربطة ونديها نفضة خفيفة ولازم يكون محتفظ بباقي ااموية ونحفظة في باقة مقفولة .

والجرجير والشبت والبقدونس نغسله ونضعو في مصفي يصفي كل مويتو ونلفه في مناديل المطبخ بقعد فترة اخضر وجميل مفرهد.
لتحميرالدجاج اخلطي بيضة ودقيق وبهارات ومعلقه خل اللون بكون دهبي والزيت مابتوسخ ومابترطش
خل والكربونات لنضافة البوتاجاز

بسحن لي حبة عدس ناعم بشيل منو نص ملعقة صغيرة بختها مع الطبيخ قبل ما يتسبك وخاصة الدمعة.
فى الميكرويف عشان ريحة الاكل اعملى حبة موية
فى كوربة واعصرى ليمنة كبيرة فيها ارمى القشرة
فى الكورية ودخليها المايكرويف خليههو شقال ربع
ساعة بيشيل ريحة الاكل

ملح الليمون لنضافة الفواصل البين السيراميك
دلكه محلب ودلكه عاديه تلخبطى معاهم مخمريه وتنقطى صندليه واى نوع خمره وتستخدميها بعد الحمام تعطير للمناطق الحساسه وبعدتخلصى من حاجاتك فى الحمام
مسح الحنه بالمجموع مبالغه سواد ونعومه من اول خته على شرط ما تغسليها.
عشان تعطري الخشم تمضغي نعناع مبالغه . حتي لو اكلت بصل او توم
تسلموا معلومات قيمه وانتي شغاله في المطبخ او البيت كثري من الاستغفار والصلاة علي الرسول عليه الصلاة والسلام والباقيات الصالحات سبحان الله تلاقي من الفتوحات في حياتك شي عجيب

ماء ورد وبدرة اطفال كقناع لوشك وانتي بتطبخي مااسك عجيب
لو عايزة تعملى شبس البطاطس المحمرة فى البيت وما تشرب ليك زيت وتطلع مقرمشة بعد ما تقطعيها كبى فيها موية ودخليها الفريزر زى 20 دقيقة كده أو غسليها بموية تلج بتتطلع رهييييبة