رواية رحمة

موضوع: رواية رحمة الجمعة أبريل 10, 2015 12:18 am

رحمه
بقلم الكاتبه
Samar Moawia
حاحكي ليكم الليله قصه رحمه بس عليكم الله طولو لي بالكم شويه و اعملو رايحيين من الغلطات الغالبا حتلاقييكم
يلا بسم الله نبدأ ... رحمه البنت الحلوه دلوعه ابوها كانت بتقرا في مدرسه جنب بيتهم في حي من احياء امدرمان في سنه تانيه ثانوي لا طويله لا قصيره معصعصه و ضعيفونه لا مفهوم ليها ورا من قدام

موضوع: رد: رواية رحمة الجمعة أبريل 10, 2015 12:18 am

البيت دا كان عايش في حاله من السلام و البساطه عيشه حلوه شديد و الحياه ماشه مطاوعاهم تعالو ندخل معاهم في تفاصيل يومهم اول زول بتصحي كريمه و تصحي حاج محمد أبوهم اقوم لصلاه الفجر و هو بطلع اصحي العيال و انزل هو واولادو الجامع و البنات بصلو قبلم واجرو ل كريمه المطبخ تكون بتجدع في اللقيمات اقعدو البنات اتونسو معاها و القطو اللقيمات الجاهزه لغايه ما الجماعه اجو من الجامع اختو الشاي و اقعدو اشربو الشاي كلهم و اتونسو شويه و بعد داك بقومو اجهزو الابو بمرق الشغل بدري و بعد داك عبد العزيز بسوق اخوانو انزلم في المدارس و امشي جامعتو اها نهايه دوام المدارس البنات عندهم ترحيل المدرسه برجعو بيهو وألقو كريمه وأقفه ليهم في الشارع حترساهم( كان امهم حيه ما اظن تكون هميمه كده) يلا الله ارحمها و ارحم امهاتنا جميعا الأحياء و الأموات .... بعد داك بدخلو استحمو وأغيرو تكون كريمه جهزت ليهم ساندوتشات خفيفه تصبيره قبال الجماعه ارجعو و تقعدم ازاكرو لغايه مواعيد ابوهم تقوم تخت الغدا مرات بلحق معاهم عبد العزيز ومرات ما بلحق برجع متاخر

موضوع: رد: رواية رحمة الجمعة أبريل 10, 2015 12:19 am

اها بعد داك الابو بطلع انوم لغايه المغرب و انزل الجامع اصلي واولادو معاهو و ارجعو بعد داك بلم ناس البيت كلهم احكو تفاصيل يومهم واتونسو لغايه العشا و بنفس الطريقه ديل امشو اصلو في المسجد وأرجعوا للعشا و بعد داك الداير انوم والداير اقعد في التلفيزون و الداير اتونس و كده يعني و يوم الجمعه الفطور ثابت في البيت الكبير في ود نباوي ألفيهو حاجه سيده ام حاج محمد واختو رقيه و اولادا بعد زوجها اتوفي رجعت قعدت مع امها و اخوهو ابو بكر عم الاولاد و شغال مع ابوهم بقي ماسك ليهو الدكاكين حقت سوق امدرمان بعد الابو عمل شركه في السوق العربي و بقا معظم الوكت هناك .. اها بعد صلاه الجمعه بمشو ل حبوبه اولادو التانيه ام المرحومه امهم و اقعدو معاها اتغدو و ارجعو بيتم( طبعا اهل كريمه من بورسودان و مستقرين هناك اصلا و بمشو ليهم في الإجازات و كده )

موضوع: رد: رواية رحمة الجمعة أبريل 10, 2015 12:19 am

تغريبا دي كانت تفاصيل حياتم و أيامهم العاديه زي ما قلت ليكم حياه مسالمه و ظريفه و جو اسري هادي .. الايام مرت و رحمه بقت في تالته ثانوي امتحنت وجابت مجموع ما بطال دخلا آداب جامعه الخرطوم طبعا هي ما زولت قرايه اصلا و مرت السنين و عبد العزيز اتخرج بتقدير حلو شديد ماشاءالله ( اصلا هو شاطر) و خطب بنت اخت كريمه
( نقيف شويه ونحكي قصتهم) قبل سنتين تغريبا ام كريمه تعبت شديد و ضربو ل كريمه تجي و قام سافر معاها عبد العزيز و عبد الرحمن الصغير و اصلا هو زول هميم وقف معاهم اكتر من اولاد الحبوبه أزتهم و شال الحبوبه وختاها و امشي الصيدليه هو اصرف اللروشتات و اسك الدكاتره
(غايتو ولد الهنا والمنا اريتو ولدي ) و اهل كريمه حبوهو كلهم طبعا و هو بستاهل صراحه يلا في الفتره ديك جات اخت كريمه من السعوديه هي و بتها الكبيره سحر ماشاءلله بنت جميله جمال بنات بورسودان الاصلي اللون لون الدهب و العيون و اهما شي و اكتر شي شداهو ليها الخجل كانت خجوله و مؤدبه شديد نعم التربيه

موضوع: رد: رواية رحمة الجمعة أبريل 10, 2015 12:19 am

اها بعد داك ساق امو كريمه و رجعو الخرطوم بعد اطمنو علي الحبوبه و كده و رجع للروتين اليومي لكن خلا قلبو هناك في بورسودان
المهم حاول اعمل رايح و رجع اندرش في الجامعه والمشاريع الما بتنتهي و مشاوير البيت و كده بعد سنه من مرض الحبوبه جات مناسبه عند اهل كريمه عرس بنت اخوها في عيد الفطر وطبعا الجماعه كلهم شدو الرحال من اخر ايام في رمضان وأتوكلو و معاهم رقيه و هبه الله بنت رقيه( متزكرين رقيه عمت العيال الزمان رشحت ليهو كريمه حتقولو العلاقه شنو يلا رقيه زوجها الله ارحمو كان في الشرطه و رسلوهو مأموريه بورسودان و هناك رقيه اشتغلت أستاذه في مدرسه بنات و كريمه زاتا كانت أستاذه هناك و علاقتم كانت حلوه شديد )) ماااا علينا المهم الجماعه زي ما قلنا وصلو بورسودان وهناك اهل بورسودان الطيبين ما قصرو و اكرموهم احسن إكرام و طبعا اخر ايام رمضان حاج محمد و ولدو عبد العزيز اليوم كلو في الجامع هناك و حصل عزا في الحله و عبد العزيز وقف وقفه عشره رجال الله احفظو و رجع قريب نص الليل طبعا و في الدفن و الجوطه ما اكل حاجه و كريمه عرفتو قامت عملت ليهو ساندوتشات و أتلفتت ما لقت زول غير سحر طوالي رسلتا ليهو و طبعا سحر زاتا شكلها اتكسرت فيهو

موضوع: رد: رواية رحمة الجمعة أبريل 10, 2015 12:20 am

المهم العرس تما بخيرو و ناس الخرطوم رجعو و الحياه مازالت روتين وردي و صاحبنا خلاص بالو بقي مع سحر القمر و يوم كده كريمه جات لقتو سرحاااااان قالت ليه بسم الله يا عزيز لي ساعه بنادي فيك وصلتا وين؟ قال ليها بورسودان و دنقر قعدت تضحك قالت ليهو اي حسيت بيك يا ولدي و صراحه كنت مستنياك تكلمني براك المهم قعد اضحك وقال ليها انا يا امي باقي لي سنه و اتخرج قبال كده ما بقدر أكلم ابوي أخطب لي و كمان البت نازله جامعه السنه دي و خايف تطير مني دبريني كريمه أخدتا ليها صنه كده و رفعت رأسه ابتسمت قالت لي الموضوع دا خليهو عليً انا وسحر ان شاءالله ما تكون لغيرك يا ولدي قام الولد باس راسا وأخد ليهو ضحكه كده وقال ليها داير لي قهوه ظاااابطه كم يدك داير أجرا الليله ل الصباح و اهما من كده داير لي دعوه قويه قامت طوالي وقعت يدينا الاتنين وقالت ليهو يااااااا ربي يا كريم انجحك و اوفقك اشوفك احسن زول يا ولدي و ابعد عنك اولاد و بنات الحرام أسخر ليك خلقو ان شاءالله و قامت علي المطبخ تسوي ليهو القهوه و مع ريحه القهوه دي نرجع ليوم تخريج عزيز ماشاءالله عليهو وشو منور زي قمر ١٤ و هناك في طربيزه الخريجين و ب الأخص طربيزه اول الدفعه قاعد حاج محمد الوقور و جنبو كريمه و الفرحه ماليه وشها و جنبهم رحمه لابسه ليك ديك يا العبايه الخليجيه الرماديه مطرزه ب الدهبي خاته ليك طرحتا الدهبيه و الشعر نازل من تحتها زي الشلال ماشاءالله و جنبهم اسلام محجبه طرحتا و وشها زي القمر منور و جنبهم العمه رقيه وحبوبتهم ان امهم الله ارحما و خالتهم ابتسام و خالتهم سهام و عمهم ابو بكر و مرت عمهم صفيه ( غايتو ماشاءالله الطربيزه عامره ما كمان اول الدفعه بكونو أدوهو كم كرسي زياده) و طبعا الشباب واقفين ورا و قامو زاعو اسمو و معاهو تكريم ل اول الدفعه ب اسمو و اشتغلت اسماء الله وطلع ماسك امو كريمه بيد و هي تبكي و تزغردو ابوهو بيد دموعو برضو جاريه و اخواتو وراهو و عبد الرحمن متقدم المسيره

موضوع: رد: رواية رحمة الجمعة أبريل 10, 2015 12:20 am

و في وسط فرحه التخريج في عيون متابعه رحمه ما نزلت منها اصلو و انتهت مراسم الاحتفال و اي خريج واقف مع اهلو و عبد العزيز واقف اتكلم مع عمتو رقيه جا شاب باين عليهو العز ماشي ب اتجاهم و سلم علي عبد العزيز وَبَارِكْ ليهو شديد و قام عبد العزيز اعرف فيهو دا حاج محمد ابوي و دا عمي ابوبكر و دا فلان ودا فلان و دي امي كريمه و أتلفت علي ابوهو قال ليهو دا طبعا يا ابوي الباش مهندس عماد كان قدامي بدفعتين وبعد اتخرج مسكو طوالي في الجامعه لانو كان اول دفعتو و كان ماسك معاي مشروع التخرج و ساعدني كتير حاج محمد سلم عليهو وقال ليهو ماشاءالله ربنا اوفقك يا ولدي عماد طوالي مسك الدرب الله اخليك يا عمي و عزيز دا زي اخوي والله و ان شاءالله كمان اعينوه معانا فالقسم و طبع هو بالو مع رحمه الأخدت قلبو

موضوع: رد: رواية رحمة الجمعة أبريل 10, 2015 12:21 am

طبعا يا جماعه رحمه من ما دخلت الجامعه و بارت بنات جامعه الخرطوم النضيفات الأنيقات بقت حاجه تانيه طبعا معروف البنات بحصل ليهم تغيير رهيب من ما ادخلو الجامعه اول شي اللبس و أقشرات ومتابعه الموضه يلا رحمه اصلا كل مقومات البنت السمحه فيها يعني الملامح ماشاءالله و اللون الأسمر النضيف داك مسحتو و دعكتو ليك و اتنضفت و شي جرسلين ب ليمون وشي بياض الثلج و شي خلطات ود الجبيل حق بري داك بقت البت نجفه بس لونا بقا انضف من اسلام الصفرا و الشعر الغزيير داك مشت لغاده شرفي عملت ليها كراتين وبقت حاجه رهيبه و اشتغلت فيهو حمامات زيت و كل نهايه اسبوع ماسك الكركار والجرجير ومع الفرد و الاستشوار الشعر دا وصل الصلب خلاص طبعا باقي ليها الجسم و تبقي ممثله بس لكن الله غالب الجسم دا بس وقعت في اسكيرتات الكلوش الوااااسعه و البوزات و القمصان المخصره و الستيانات المحشيه ديك
خلاص بقت مزه و عادي كده ممكن تقولو اسمح واحده في جامعه الخرطوم

موضوع: رد: رواية رحمة الجمعة أبريل 10, 2015 12:21 am

وطبعا قبيل قمت رحمه ما زولت قرايه اصلا و ياها بارت الجامعه و مواضيعا و عملت ليها شله ظريفه كده من اربعه بنات فدوي السمحه بنت جميله ورقيقه و هاديه مخطوبه لولد خاله امها .. مها المجنونه بنت ظريفه كده دمها شربات و كلبوظه و وشها بيبي فيس ًو التالته زينب درويشه شويه كده و فيها جسم ولا كيم كارديشان زاتو و قرت الثانوي مع رحمه و الرابعه عبير السمحه برضو بنت نجفه ماشاءالله حلات الدنيا عليها وبت أسره معروفه اها ورحمه الخامسه في الشله اها البنات ديل كانو من أشهر بنات الجامعه لسببين الاول انهم سمحااااااااااات و التاني انهم مشختيييين ل اي زول في الجامعه كان ولد كان بنت ما مدين زول فرصه ادخل فيهم و طيعا المعجبيييييين كتاااااار لكن ما عندهم طريقه في واحد كده غايتو ولد ضعيفوني و لابس ليهو نضارات قعر الكبايه ديك و خجول بزياده و هو في الحسبه عم زينب ياهو الولد الوحيد المره مره بقيفو اتونسو معاهو

موضوع: رد: رواية رحمة الجمعة أبريل 10, 2015 12:22 am

مرت الايام والجديد الفيها انو عزيز اتعين في الجامعه و زي ما قلنا خطب سحر السمحه و هي طبعا اسي في تانيه طب الرباط و اسلام بقت قمر ١٤ و اسي ممتحنه الثانوي وعبودي (عبد الرحمن الصغير) في مدرستو و اطلع العب كوره مع اولاد الحله في الميدان القدام سينما الصافيه داك و ياها رحمه في جيهتا و نضافتا هي و الشله كل نهايه اسبوع بطلعو من الجامعه بعربية عبير امشو لغاده شرفي اعملو حمام الزيت و كان الخلطات خلصت اغشو عماد اجيبو ليهم خلطات و منها اشوفو ليهم مطعم في الرياض اتغدو و بعد داك بمشو يا بيت مها يا بيت عبير لانهم الاتنين ساكنين الرياض اقعدو اشوفو حاجات الاسبوع احاولو اخلصو منها (طبعا ما قلت ليكم فدوي داااااافوره ماشاءالله ما عندها مشكله هي ومها ياهو المو الباقيين اشرحو ليهم و امكن دا السبب البنجح رحمه
(بعد ربنا سبحانه وتعالي طبعا) اها اصلا عبير و مها و زينب ساكنين التلاته قريب لبعض اتنين في الرياض و التالته في الطايف و فدوي ساكنه كافوري و رحمه الصافيه زي ما قلنا قبيل اها بجي عبد العزيز ولا فارس اخو فدوي ارجعهم الاتنين فكده ايامهم ماشه طبعا

موضوع: رد: رواية رحمة الجمعة أبريل 10, 2015 12:22 am

اها عزيز جاتو فرصه الماجستير في بريطانيا و قرر اعمل عرسو قبال اسافر وفعلا كلم ابوهو و امو و شاور سحر و اهلها و وافقو طبعا وسحر قررت تجمد السنه و تعرس و تمشي معاهو وبعد داك تجي تواصل و فعلا بدو اجهزو للعرس و طبعا خلال الفتره الفاتت دي الباشمهندس عماد كان بتقرب من الحاج محمد و عبدالعزيز و لمح ليهو كمان انو داير اناسبهم و عزيز قال ليهو أبشر بس البنت صغيره لسه لكن نشاور الحاج

اها التجهيزات ماشه علي قدم وساق و حاج محمد دا ما خلا شي بوادر البكر و طبعا كريمه الفرحه ما سايعاها ياهو ولدها و بتها و طبعا رحمه كل يوم لافه مع سحر و كريمه و جات سهام ام سحر القطو في شيله العروس و اجهزو في حاجاتا اها طبعا رحمه محبوسه مع سحر و مخمخمه ب العبايه والجونتات و الشرابات اها يلا اليوم داك قاعدات في نص السرير في و معاهم ابتهال صحبه سحر بتناقشو في تمشي تتجهز وين و اختارو في الحنه و ياها حاجات البنات دي و مرت الشهرين سريع و طبعا قبلها كان عملو عقد بسيط اهل بس عشان اقدر عزيز اقدم ورق سحر معاهو و جا يوم العرس لكن سحر ما طلعت حاجه عجييييييييبه ماشاءالله التقول اسبانيه بس و مدام سوسن الخفجي أبدعت فيها و جا ليك عزيز منووووووور في البدله السودا حلات الدنيا كلها فيهو و سايق ليهو صحبو و طبعا الكبكبه وكت جات سحر مارقه الولد قرب أقع من طولو غايتو ما معروف وصلو الصاله كيف و طبعا حاجه كده عجيبه كانت الصاله كلها مزينه ب اللون الدهبي و الاوف وايت و الوردي و الكوشه من كوش عباس السمحه ديك الفيها قوس حق ورد و زي عمودين بالجنبات فيهم انوار دهبيه و ورد من فوق حاجه كده غريبه و التورته خرااااااااافيه غايتو كان الجو كلو ابدااااااع و طبعا كلو من تنظيم رحمه و صحباتا الشديدات اللضيضات اها اشتغلت ليك الموسيقي و جو داخلين رحمه و اسلام و نور اخت سحر شايلين ليهم بوكيهات ورد ب الوردي و الاوفوايت و لابسين فساتين دهبيه كلو واحده تفصيلتا براها طبعا اها اسلام لابسه الفستان حقها زي العبايه المغربيه ولافه الطرحه و عامله مكياج خفيف ماشاءالله تبارك الله و نور صغنونه لسه تكون في الابتدائية لابسه ليها فستان اطفال حلو كده و نجي ل رحمه لابسه ليها حاجه كده ما مفهومه فستان ولا اسكيرت وبلوزه المهم حاجه كده خرااااافيه و فاكه الشعر دا مغطي الصلب ماشاءالله و طبعا كانت غاتسه عند غاده شرفي من الصباح و عملت مكياج خطوبه عديل و بعد اشويه اشتغلت اغنيه الزفه حاجه كده خليجيه ما بت السعوديه البت غايتو اغنيه حلوه المهم جو داخلين غايتو بس زي للأفلام كلو واحد احلي كم التاني
ماشاء الله عليهم ما نسحرم و استمرا العرس و طه سليمان اغرد ما بنقول اغني لانو ابدع للجماعه ديل و بعد داك جات فنانه الدلكه طبعا كان مفروض انصاف مدني لكن شرتهم كلعاده لانو جاتا حفله في الدوحه (تجربه شخصيه ) اها انتهي الجرتك و ساق عروستو و سافر و الجماعه اتفرتكو خلاص

موضوع: رد: رواية رحمة الجمعة أبريل 10, 2015 12:24 am

طبعا قبال العرس بكم يوم جا الباشمهندس عماد و اتكلم مع حاج محمد و طلب يد رحمه و حاج محمد قال ايهو نشاور الاهل و البت و نديك خبر يلا الماقلناهو انو يوم العرس الصباح عزيز ساق رحمه موديها الكوفير فتح معاها الموضوع و شكر ليها الراجل شديد وقال ليها انا راي قلتو ليك لكن انتي صغيره لسه استخيري و شوفي راي ابوي شنو اها خلا ليك البت راسا جايط و طبعا فتت الشمار كلو ل صحباتا اها وكلهم مركزين اشوفو عريس الغفله و هو طبعا قاشر ب البدله الكحليه و اليد محننا و الطول و السكسوكه واللون دهب بس و النضاره الطبيه غايتو حاجه كده غريبه بس البنات كلهم اتكسرو و طبعا و بدو آملو ليها راسا العريس الوجيه اوعك تطيريه و طبعا خلاص هي الموضوع وقع ليها و مع كسيرت البنات كانت خلاص هي زاتا وافقت واتدفقت عديل

موضوع: رد: رواية رحمة الجمعة أبريل 10, 2015 12:24 am

احكي ليكم شويه عن الباش مهندس عماد اى عمده زي ما بنادوهو اصحابو طبعا وصفتو ليكم و اتفقنا كلنااااا انو الولد قااااطع يلا نشوف الباك قراوند حقتو هو الولد الوحيد بين خمسه اخوات

موضوع: رد: رواية رحمة الجمعة أبريل 10, 2015 12:25 am

اها قلنا الام قشت يدها في الواطه قالت اصلو البت دي ما بتدخل علينا و الولد كمان حرد و طفش من البيت عفوا القصر قصدي اها الولد كمان مشا ل ابوهو في بيتو التاني وطبعا علاقتو ظريفه مع المره التانيه و كلم ابوهو امشي معاهو و طبعا الإقنع الابو منو اقنعتو مرتو التانيه و السبب عشان تغيظ مرتو الاولي طبعا
اها و الابو ما بقول لا اصلو ل ست الحسن (دا ما اسمها طبعا قلت ليكم بنت الأحفاد اسي في بنت احفاد اسمها ست الحسن

موضوع: رد: رواية رحمة الجمعة أبريل 10, 2015 12:25 am

اها جا الخميس و طبعا رحمه كبكبه تقيله و من الاربع البنات كلهم بايتات معاها و واحده شغاله دلكه و واحده تلفلف في الشعر و اتنين قاعدات انكتو في الدولاب و طبعا الونسه مدورة اها الخميس من بدري كريمه قامت في المطبخ ما خلت شي و حلفت ما اجيبو شي من برا حتي ألجاتو و الحلويات سوتهم براها و بخرت البيت و فتحت القران ما خلت شي اها المغرب استحمت و لبست توبا و طبعا اصلا هي مره سمحه ما محتاجه ليها شي و اسلام بعد المدرسه عندها مجموعه فيزياء في المدرسه زاتا و بعدها جات راجعه البيت مع عم اسماعيل السواق الاصلا هو كان شغال مع حاج محمد من بدري و واثق فيهو شديد
(عزيز ما سافر خلاص) و رجعت استحمت و قعدت مع رحمه والبنات شويه و بعد داك قامت تلبس و نزلت تشوف كريمه و تقعد معاها و طبعا شقاوه عبد الرحمن و مناقرتو المعاها ما بتنتهي
اها المغرب اذن الجماعه ما وصلو والعشا اذن الجماعه ما وصلو و الساعه دخلت علي ١٠ و الجماعه ما جو
(غايتو ما معروف مواعيد سودانيين ولا حركات نسابه ولا ظروف ساي انتو و خيالكم

موضوع: رد: رواية رحمة الجمعة أبريل 10, 2015 12:26 am

نسيب الجماعه و نطلع شويه نشوف رحمه غايتو ماشاءالله كانت حاجه كده عجيبه لابسه ليها اسكيرت ميدي( طولو فوق الساق بشويه) و كسر كسر (مكسر يعني و زي الكلوش فيهو نفشه حلوه) لونو بني محروق و فيهو من تحت زي طقه التوب دانتيل مطرز ب الوردي و الفوشي و من فوق لابسه ليها قميص قصه غجريه ألفيهو شويه نفشه من حتت الصدر تحت الرقبه علي شكل سبعه و جايه بودي ماسكه في الجسم و مورده كلها ب الوردي و الفوشي و الاوفوايت و لابسه ليها شبشب بسيط سير فوشي و الحجل رقيق مع اللون النضيف داك و ضاربه ليك المنكير الفرنش رجلين و يدين حاجه كده ما تخلص و الشعر طبعا مستشوراهو و فاكاهو كلو و عامله ليه مسكه ب الجنبات من قدام زي البعملوها النسوان ف مسلسل حريم السلطان
وزينب عملت ليها مكياج خفيف وردي حاجه كده ما تخلص و طبعا ما حكيت ليكم انو رحمه بعد عرس عزيز مشت المك نمر قدت ليك داك يا الزمام

موضوع: رد: رواية رحمة الجمعة أبريل 10, 2015 12:26 am

جات رحمه من هناك داخله تقول غزال شارد من الجنه حلا شديده و خجلانه و مدنقره وماشه تتكعوج (طبعا من الكبكبه نست المشيه الاتدربت عليها مع صحباتا القهوررات) المهم جات داخله مدنقره و طبعا قبال ما تدخل كانت اسلام ًورتا الموقع حق ام العريس واصلا هي كانت لمحتم من البلكونه و هم داخلين اها جات داخله و وقفت كريمه و عرفتا علي القاعدات يا رحمه تعالي بجاي سلمي علي خالتك سناء و دي خالتك فلانه ودي خالتك علانه و ديل الاخوات اها انتهي التعارف و طبعا النظرات بتختلف ما بين معجب ب الجمال و النعومه دي و ما بين غيران انو اسي دي اسمح من بتي في شنو لامن اختارا الولد عماد دا (طبعا دي خالتو كانت مضربه ليهو علي بتها) و ما بين نظرات الام الغريبه ما مفهومه شنو و فجاه كده من غير مقدمات المره زحت كده في الكنبه و نادت ليك رحمه تعالي يا بتي جنبي هنا الله استر غايتو قامت رحمه تتكعوج في مشيتا لغايه وصلت نهايه الصاله وقعدت جنب نسيبه المستقبل التقول سعي الصفا والمروه بس ما خطوتين وطبعا دا من الخوف و الكبكبه اها قومي يا المرأ ختي يدك في شعرا زي البتملسي ليها كده و اساليها اها بتقري وين (طبعا المفتحات منكم حافهمو الحركه و للقطط المغمضه فهي قصدها تشوف دا شعرا ولا تركيبه ) اها بعد اطمنت لوت خشمها ب الجنبه شكلها كانت ناويه تعملو سبب و تقول البت مزوره

موضوع: رد: رواية رحمة الجمعة أبريل 10, 2015 12:27 am

اها قامت رحمه ردت براحه كده بصوت ناعم قالت ليها انا بقرا في تانيه آداب الخرطوم قومي يا المره اعوجي خشمك هي لكن صغيره و وراك مشوار انا مستعجله دايره افرح ب الولد و اشوف ليهو جنا قبال ما اموت طبعا الصاله كلها اتملت بعد الشر و الله اطول في عمرك و تشوفي ولد الولد و و و (جنس دراما غايتو) طبعا هي كانت دايره رحمه تعترض او تقول اي شي تديها سبب تفركش بيهو الموضوع و طبعا رحمه خشمها ما فتحتو زي ما وصتها امها و استلمت الكلام دا خالتا قالت ليها ومالو كان ربنا كتب النصيب البت من بيت راجلا بتقرا وانا زاتي تميت جامعتي في بيت راجلي مافي مشكله غايتو المره الكلام ما عجبا اصلو لكن سكتت تلولو في خشما ساي اها آكلو و شربو و حلو ما خلو شي و قامو مارقين و قريب ل خشم الباب أتلفتت الاخت الكبيره قالت ل كريمه ان شاءالله الرجال بحددو ليكم قريب المواعيد و نكون اهل ان شاءالله ورحمه الله اكتبا من نصيب عماد و امح امح امح سلمو و مرقو طبعا رحمه جرت جري فوق من ما طلعو ما صدقت جرت الحمام قالت جاها اسهال (معليش للجماعه القرفيين) دخلت كريمه و سرحانه و رقيه بتتكلم معاها وهي ماسامعاها زاتو في عالم بعييييييد و قلبها اصلو ما ارتاح ل الناس ديل و نوت تقعد رحمه و تكون صريحه معاها و اليوم انتهي

موضوع: رد: رواية رحمة الجمعة أبريل 10, 2015 12:27 am

ما دايره ادخل في تفاصيل ونسه البنات فوق لكن الحته الوحيده المفيده الاتقالت من فدوي قالت بيها استخيري و ربنا لو فيهو خير ليك اجعلو من نصيبك و اسهل ليك الموضوع دا و اتخمدو نامو علي كده .،تاني يوم من الصباح الجمعه طبعا الابو ساق عبد الرحمن و كريمه و طلعو ل الزيارات الاسريه وطبعا اسلام ممتحنه بتقعد تزاكر و رحمه معاها صحباتا قالو احسن اخلوهم براحتم و يوم الجمعه دا كلو مرا ب سلام وإلحاجه المهمه ألفيهو انو حاج محمد وكت مشا البيت الكبير قعد مع ابوبكر اخوهو و قال ليهو دايرك تسال لي من الناس ديل داير اعرف كل صغيره وكبيره عنهم و ما قصدي شغل الابو و منصبو لا داير اعرف اصلهم و فصلهم لغايه اخر جد عندهم و دايرك تسال لي عن الولد شخصيا و أخلاقو واصحابو كان بشرب سجاير تكلمني ما تغفل من اي تفاصيل و ابو بكر قال ليهو ابشر تسمع كل خير عنهم ان شاءالله و رحمه بتي و مربيها معاك و حريص عليها قدرك و اكتر يا اخوي اها نخلي الرجال في كلامهم و نمشي لينا حته كده تقول قصر من قصور القصص و ندخل علي الجماعه ديل نشوف بقولو في شنو اها سناء قاعده ترقي ب التلفون مع واحده من صحباتا جاتا رزان امي ابوي قال ايك تعالي الديوان دايرك اسي سريع طنطنت شويه و قفلت التلفون و نزلت مشت علي راجلا لقت بناتا قاعدات و عماد و ابوهو ،اها خير يا حاج كان داير تسال من الموضوع بتاع امبارح انا ما داخل لي راسي و البت صغيره ما حمل مسووليه قام الابو نهرها اسكتي و اسمعيني انا سالتا من البت وأهلا ناس ممتازين و سمعتم كويسه و انا حاضرب ل ابوها و احدد معاهو مواعيد ل التعارف انتي كلمي إخوانك وانا بضرب ليهم أأكد عليهم ب المواعيد المنتفق عليها و تاني ما داير اي نقاش في القصه دي و قام علي حيلو انا مأرق دايرين شي و طبعا دي الطريقه العسكرية العايشين بيها الجماعه ديل اها المغرب ضرب الابو و حدد مواعيد مع حاج محمد بعد اسبوعين عشان اديهم فرصه اسالو و و و

موضوع: رد: رواية رحمة الجمعة أبريل 10, 2015 12:28 am

اها الجماعه بقا موضوعهم و ونستهم كلها العريس المرطب الوجيه الما بتفوت و طبعا اي زول اسالو هو عنهم أشكر فيهم ساي غايتو الا كم زول طبعا شبكوهو دا كوز و حرامي و ماكليين قروشنا و و و أما الولد سمعتو ما كان فيها غبار اصلو ولد كويس ما ليهو في امور النسوان و الخمج حق شباب اليومين ديل لا حشيش لا بنقو لا سكر لا نسوان و كان صادف حايم ف الحله بصلي في الجامع الجنب بيتهم العملو ابوهو زاتو ( يعني كان اتشاكل ليهو مع واحد عادي اطردو من الصلاه اقول ليهو جامع ابوي) بهظر بهظر اها موضوع السؤال مشا ظريف لطيف و رجع ابوبكر مبسوط حكي ل حاج محمد و طبعا حاج محمد انبسط و ضرب لعبد العزيز كلموا و عبد العزيز زاتو حمس ابوهو شديد للموضوع طبعا الما حكيناهو انو عبد العزيز كم مره مشي بيت عماد و هناك أكرموه ب الزياده لانهم كانو خاتيين عينهم عليه ل رزان و هو افتكر انهم ناس طيبين و خلاص (طبعا انا بتكلم عن الام سناء و الاخوات) اها قبل الأسبوعين انتهى حاج محمد نادا كريمه و قال ليها انا سالتا من الولد و اهلو و ناس كويسيين و استخرتا كم مره و حاسي مرتاح طبعا هي سكتت مسافه بعد اشويه قالت ليهو ان شاءالله يا حاج كان فيهو خير ليها ربنا اسهل ليها قام نادا رحمه و سالا و طبعا سكتت ودنقرت سالها تاني يا بت القرار دا مصيري استخرتي ولا لا؟ ندي الناس ديل كلمه ولا نصرفهم قالت ليه التشوفو يا ابوي و ابتسمت اها كمان هو فهم و قال ليها ربنا اسهل ليك و قام مرق و هي من الفرحه قعدت في الواطه جنب رجلين كريمه وقالت ليها تصدقي يا امي حاسه روحي حاطير من الفرح كانو ربنا استجاب لكل دعواتي ..يا بتي انتي استخيري وما تستعجلي لسه صغيره و وراك جامعه وقرايه نطت رحمه انا ما دايره القرايه دي زاتي و الجامعه دي ما دايراها تكون لي مشكله لو هم مستعجلين( جنس عباطه غايتو ) كمان كريمه قالت ليها يا بتي انا صراحه امو دي ما ارتحتا ليها و شكلهم ناس ما هينين و خايفه ليك من المشاكل بعدين ما تقدري تتعايشي مع الناس ديل قالت ليها يا امي انتي بس قولي ما دايراني اخليك لكن ما تخافي بكلمو اسكني قريب متك و كل يوم بجيك و بعدين ما ياهم كل امهات الاولاد في الاول صعبييين بكونو موش كريمه مع حماس رحمه دا كلو سكتت و قالت ليها قومي صحي اسلام تقوم تقرا و الكلام دا اسي خليهو لكن ما توقفي استخاره و اقري الدعا حقها بقلبك في كل لحظه و ربنا اسهل

موضوع: رد: رواية رحمة الجمعة أبريل 10, 2015 12:28 am

طبعا رحمه سرحت مع نفسها و اتخيلت حياه ورديه كلها دلع و حب مع فارس الاحلام و خلاص الموضوع بقي ليها شبه حقيقي و طبعا اهما الأسباب الدخلت الموضوع رأسا وخلتو اعشش فيها اول شي الولد وجييييييه و مرطب(سطحيه) و صحباتا كلهم اتكسرو فيهو
(سمييييعه و أضانا خفيفه) و كمان انها كانت لسه عايشه جو عرس عزيز الكانت مشرفه علي كل تفاصيلو هي خلتا تندمج مع الموود و تتحمس ل انو تجهز لعرسها هي زااااتا
مع انو كل ما تسرح اجيها كلام امها انو امو وأخواتو ديل ما شكلهم هينين اصلو لكن تقول لالا انا مالي و مالهم يشترط عليهو اسكن براي بعيد منهم و بحاول ما احتكا بيهم اصلو و لو في طريقه بقنعو نسافر و كده آكون في السيف سايد (يا حليلها المسكينه كان تجي تستشيركم هنا قبال ما تتهور) اها المعلومات الجديده انو حاج محمد اتصل الجماعه و اتفق معاهم علي يوم محدد و شبه اداهم موافقه خلاص (يوم لتعارف الرجال ما للعرس ما تتلخبطو ساي) و كلم اهل رحمه ل امها المتوفيه الله ارحمها و كلم اهلو هو والبرتوكولات دي و الامور مشت سمبتيك و جا اليوم الموعود و طبعا كريمه ما قصرت وقفت وقفه عشره نسوان و جهزت اي شي و جو الرجال و طبعا ونسه الرجال ما بتهمنا كتير لكن الداريين نقولو انو فجاه كده كم طلقه ًفجاه كده حاج محمد طلع برا و قلد كريمه و قال ليها مبروك يا ام العروسه بتك عقدو عليها خلاص عقبال اسلام و بهناك كريمه فكت الزعاريت خلاص و رحمه قلبها ولع و قامت فوق وكت الخبر وصلا حضنت كريمه وإسلام و ابكو شويه و تزغردو شويه و ضرب عزيز وفتحت اسلام الاسبيكر و سحر بهناك تزغرد معاهم و الناس الفرحه ما سايعاهم و ضربت ل الشله كلمتهم و باركو ليها و كان برنامج اها نرجع للرجال شويه بهناك عم عماد الكبير و هو بعرف حاج محمد لانو كم مره دخلو في شغل سوا و علاقتم ما بطاله و هو الاصرا اعقدو قال ولدنا جاهز للعرس و مستعجل كمان ف انحنا مبدئيا نتفق علي الفكره و نخلي العرسان اشوفو المواعيد البتناسبهم الاتنين اها رايك شنو يا حاج محمد و الابو استلم الكلام قال و من اسي حرم و علي ب الطلاق العرس دا انت تجي فيهو ضيف بس و رحمه بتي انا يتكفل ب العرس كلو قام حاج محمد اتنفض و دعك يدو في الواطه وحلف اصلو الكلام دا ما بحصل اها الجماعه دخلو هدو الموضوع و كمان في الاخير وصل حاج محمد لحل و قال ليهو انا مهر ما بشيل في بتي و الحاجه الشرعيه بس اعتقد ١٠٠ جنيه ولا حاجه كده و في الاخير المجلس فضي و اتفرتكو و حاج محمد نادا عيالو و مرتو و حكي ليهم الحصل كلو

موضوع: رد: رواية رحمة الجمعة أبريل 10, 2015 12:29 am

تاني يوم ضرب عماد ل حاج محمد و اتونس معاهو شويه و قال ليهو داير استازن منك اجي اسلم علي ناس البيت
(الولد زوق) طوالي نطه حاج محمد قال ليهو سبقتني ولد حلال عمرك اطول من عمري اسي داير اضرب ليك اعزمك الليله العشا عندنا ان شاءالله و مجاملات تقيله و قام حاج محمد قفل من عماد و ضرب لكريمه كلمها عشان تجهز للعشا و تدي خبر ل رحمه لانو اكيد حاكون داير اقعد معاها و كده و قال ليها رسلي جيبي لوازمك مع اسماعيل و لو دايره شي جاهز كلميني بجيبو معاي بعدين وانا راجع العصر و قفل علي كده و كريمه طلعت كلمت رحمه طبعا كانت قاعده في نص السرير مفرشه ليها ملايه قديمه و لابسه ليها قميص هزاز و ممسحه ليها ب شي الحسم دا كلو المع تقول زيت سمسم والشعر دا المع من الكركار و مليون كعكه و الوش لونو علي اصفر مجلطه ليها حاجه زي الكستر كده

موضوع: رد: رواية رحمة الجمعة أبريل 10, 2015 12:32 am

نرجع لرحمه بعد استحمت لفت البشكير و اتربعت في نص السرير و جابت ليك المنكير التركوازي و ضربت ليك الرجلين و اليدين و كوركت ل اسلام تجي تضرب ليها اليد اليميين و قعدت جنبها في السرير و رحمه بتحرك في يديها بتنشف المنكير اسلام قالت ليها اسي يا رحمه انتي مقتنعه ب موضوع العرس المستعجل دا ماتصبرو الكم سنه الباقين ليك دي تكوني اتخرجتي ما معروف بعدين تقدري تواصلي ولا لا امكن الموضوع ابقي لبك صعب رحمه تتبسم ساي و سرحت في عماد و الفستان الأبيض و الزفه غاااايتو .. قامت رحمه بعد المنكير نشف صَلِّت المغرب كان اذن خلاص و طلعت ليها اسكيرت ابيض منفوش و فيهو تطريز خفيف ب الليموني و لبست بلوزه كلها دورانيات داخلتا في بعض ب الليموني و التركواز و الأصفر و الأحمر و الارضيه حقتا اسود جايه ماسكه لغايه الكمر حق الاسكيرت و تحت فيها نفشه حلوه و بسيطه و فيها فيونكه ب الجنبه (ما عارفه قدرتو تتخيلو معاي الشكل و الكم لغايه نص اليد و لبست اكسسوار بسيط شكل فراشه و لبست الحجل و حلق بسيط طقم الاكسسوار فراشه برضو و خاتم في صباع الرجل غايتو جنس نعومه و رقه ما حصلت
و المكياج عباره عن كحل تركواز في العين تحت و ماسكرا و غلوس لحمي و حبه بلشر و بدره خفيفه و فكت الشعر و رفعتو من قدام ب طوق ابيض صغنون

موضوع: رد: رواية رحمة الجمعة أبريل 10, 2015 12:33 am

اها الساعه ٨ شوووووكه عماد واقف قدام بيت الجماعه و اخر شياكه و شايل ليهو كيس أنيق كده فيهو تلاته علب جواهر جلكسي و مخمخ ليهو من حاجه تانيه فايتو ما معروفات شنو و قاااااشر لابس ليك داك يا البنطلون البني المحروق و القميص الاوفوايت المخطط طولي و الجزمه (انتو بكرامه ) تلمع ب الله ناس تقول عايشه في كوكب تاني ما نفس السودان حقنا دا و الساعه الروليكس تقول يا ليل و ريحه ون مليون ملت الشارع و قال كده دقا ليك الجرس و جات الشغاله فتحت و دخلتو الصالون و مشا ليهو عبد الرحمن سلم وقعد اتونس معاهو اها جا حاج محمد من الجامع و قعد اتونس مع عماد و بهناك الجماعه جهزو السفره و نادوهم طبعا قعدو و عماد مبسوط ب انو الناس دا ظاهر عليها مبسوطه بيهو و أكرموه و جات نازله رحمه تتقدل عماد لامن شافا شال نفس و وقف علي حيلو قرب اقلب السفره جنس كبكبه غايتو و سلم عليها و قعدت اها اتعشو و دخلو الصالون جو وحاج محمد نادا رحمه و حات شايله صينيه الشاي و كبت ل ابوها و عماد و جات تمرق ناداها ابوها و شال كبايتو و مرق
(جنس ظرافه غايتو)
واها عماد شال كبايتو وجا قعد في الكرسي الجنب رحمه و قال ليها مبروك لي بيك يا احلي عروس في الكون وهي طبعا تتخجل و مدنقره قال ليها اسي يا رحمه انتي مرتي مفروض تاني نا تخجلي مني و انا أوعدك اصلو ما بزعلك في يوم و هي ساااااكته و تمسك يدينا سوا وتفكهم جنس كبكبه اها لقي مافي طريقه الا اجرجرا في الكلام انتي بتقري في الخرطوم موش كدي احكي لي عن جماعتك و دراستك

موضوع: رد: رواية رحمة الجمعة أبريل 10, 2015 12:33 am

و الونسه شويه شويه أخدت منحني تاني و بدا روميو افت ورقو شويه شويه قال ليها متزكره يوم تخريج عزوز انا اليوم داك شفتك و قلبي وقف و صممتو تكوني لي صديقه و حبيبه و زوجه و ام اولادي رفيقه دربي ان شاءالله دنقرت كده و الوش دا بقي طماطم بس و براحه كده قالت ان شاءالله قام قرب منها شويه كده و مسك يدها و رفعا باسا قال ليها اسي انتي مرتي و انا دايرك تكوني صحبتي و اقرب زول لي دايرك تكوني نصي التاني و تكمليني تستحمليني و تصبري علي و تصلحيني رايك شنو و أوعدك اخليك اسعد واحده في الدنيا دي كلها جاتا جراءه كده فجاه و رفعت عيونا ختتم جوا عيونو و عاينت مسااااااافه كده جوا عيونو زي الكانت بتشوف هل دا كلام حنك ساي ولا جد جد هو طبعا دأب و اتكسر و سرح مع العيون العجيبة دي
(قبيل ما قلنا عيون غزال ) قام طلع ليهو حاجه كده و ختاها ليها في يدها الكان ماسكا و قام علي حيلو قال ليها انا حاستاذن بعد دا لكن ان شاءالله حاتصلً ليك الليله بعد ارجع البيت بتكوني صاحيه؟ هزت راسا كده يعني اي قام قال ليها طيب حبيبتي انا اقول ليك في امان الله و نادي لي عم محمد معاك قامت مارقه و هو اعاين فيها من اولا ل آخراً و مدشدش و مكسر و روحو مارقه عدييييل
قام ناداها فجاه كده قال ليها نسيت حاجه جات راجعه و هو قام علي كيس هدايه كده كان شايلو و أداها ليهو و قال ليها دي هديه بسيطه بمناسبه العقد و مسك يدها باسا و ابتسم هي قربت تدخل جوا الواطه و قامت جري من وشو لقت ابوها في الصاله البره :ابوي عماد دايرك جوا و جرت طلعت فوق طبعا جرت جري علي اوضه كريمه و الباب زاتو ما طفت و دخلت لقت كريمه بتلملم ليها في حاجات كده قالت ليها امي عايني عماد جاب لي شنو و جات قعدت جنب امها في طرف السرير وفتحت العلبه الاداها ليها اول لقت انسياله كده من داماس حاجه كده عجيبه نازله منها قلوب و نجوم وحاجات ظريفه كده امها ابتسمت وقالت ليها تلبسيها ب العافيه حبيبتي تستاهليها قامت قالت ليها اصبري نشوف الكيس فيهو شنو لقت ليك الاي فون الجديد اسوي كده و الكفرات اشكال و اللوان معاها شي فوشي و شي ورد وشي فراشات وشي فيونكات غايتو جنس دلع وهي تستاهل صراحه ما دي رحمه كمان ما كتير فيها الدلع و معاهو شريحه جديد زين و ورق التسجيل حق الخط كان ب اسم عماد طبعا المهم اتونست مع امها شويه و حقت ليها ب اختصار و قامت توري اسلام لفتا في سابع نوما قامت صحتا سريع قالت ليها قومي النايمه ليها شنو انا ماشه اغير وأخت التلفون دا في الشاحن تكوني صحيتي ننزل نتعشي انا قبيل لقمه ما قدرتا ااكل

» رواية المسؤولية
» رواية الصكوك
» رواية ﺣﻮﺵ ﺑﻨﺎﺕ ﻭﺩ ﺍﻟﻌﻤﺪﺓ
» رواية ﺑﻨﺎﺕ ﺍﻟﻠﻴﻞ