رواية رحمة

موضوع: رد: رواية رحمة الجمعة أبريل 10, 2015 12:45 am

تاني يوم من الجماعه شربو الشاي و حاج محمد طلع طوالي كريمه طلعت أوضتا فوق وقفلت الباب و جابت دهب رحمه و فرتكت الغوايش تقلب فيهم يمين شمال ما لقت ختم اصلو و الساعه ١٠ الصباح ضربت ل رقيه قالت ليها اسي جايه عليك وكت ارن ليك اطلعي لي برا طوالي و بفهمك بعد اصلك و لبست عبايتا و شالت صندوق من صناديق الهدايا الوسط و ختت دهب رحمه الجابوهو ليها كلو فيهو و مرقت مع عن اسماعيل و مشو ساقو رقيه و هناك اتحركو علي سوق امدرمان حق الصياغ ل دكان معاويه تبيدي اصلو زبون كريمه من زمان و في الطريق حكت ل رقيه الموضوع كلو و رقيه تبلع في ريقا ساي و رفعت غويشه تعاين فيها و تقلب فيها و غلبا التقولو غايتو العارفينو انو رقيه و كريمه طلعو من عند الصايغ مزبهلليين مافي وصف تاني لحالتم اصلو ،، و كلام الصايغ زي السم في اضانم؛ اي دا دهب صيني مطلي ب مويه دهب و صعب الواحد اعرفو الا زول عندو خبره في الموضوع دا خصوصا انو مطلي جديد ...... غايتو الختم طلعت دهب اصلي لكن الباقي كلو

موضوع: رد: رواية رحمة الجمعة أبريل 10, 2015 12:45 am

ما صحت الا العصر قامت اتوضت و صلت و قامت علي الريحه و زي ما اتوقعت تمام لقتو زي التقول زايدينها مويه مسكت سبحتا و استغفرت مساااافه و ضربت لعماد قالت ليهو دايراك ضروري اول ما تفضي قال ليها اسي انا في بحري عندي شي بخلص منو و بجي عليك طوالي،، لقت البيت صااااني طلعت فوق مافي اي اثر للبنات نزلت تحت لقد عبدالرحمن قاعد قدام التلفيزون ؛اخواتك وين ؟ مرقو مع عم اسماعيل قالو الليله رحمه عندها قياس فستان ولا حاجه كده ؛اهااا اي صحي نسيت ؛ دايره حاجه يا امي ؟ لالا سلامتك اسي بخت الغدا ابوك الصباح قال حاتاخر ،، انا اتغديت قبيل جات خالتو سهام و معاها امل كتير و ختت لي اتغدينا و معانا البنات قبال اطلعو و انتي اسلام طلعت تناديك لكن كنتي نايمه خلتك ،، طيب سمح دخلت المطبخ جهزت صينيه غداً و استنت لغايه عماد جا ختت صينيه الغدا اتغدو و سوت ليهو شاي و دخلو الصالون ؛ تسلم يدك يا خاله ؛ الله اسلمك دي سهام الله اديها العافيه اها كيفك انت و كيف الاهل ؟ بخير الحمدلله اللليله رحمه قالت بتستلم الفستان ان شاءالله اطلع زي ما دايراهو ؛ ان شاءالله ،، من صنت كريمه و دنقيرتا في الواطه و حركه رجلها حسا في حاجه ما ياها؛؛ خالتي مالك ان شاءالله خير حاج محمد كويس؟ انا قبيل غشيتو سلمتا عليهو في الشركه ! لالا كويس يا عماد لكن انا الدايراك في موضوع كده و حبيت نتكلم فيهو برانا و انت عارف انك زي عبد العزيز و عبدالرحمن اولادي : أتشرف انا يا خالتي لكن والله قلقتيني خير ؟ لآلا خير انشاءالله
( من جواها عاد يا ولدي الخير اجي بوين مع امك دي) والله يا ولدي انا ما بعرف الف وادور لكن الليله مشيت الصايغ عشان اضييق غوايش رحمه الجبتوهم ليها و الصايغ قال لي الدهب دا مغشوش وفعلا الدهب كلو ما مختوم ..طبعا عماد زي الصبت فيهو مطره و ما قدر افتح خشمو بعد مسافه قال ليها بصوت متحشرج كده كيف يعني؟ قالت ليهو يا ولدي الزول الاشتري ليكم الدهب دا شكلو غشوهو ((ياخ المره دي حكيمه بشكل)) عشان كده ارجع شوف فواتير الدهب دا وين و ارفعو قضيه في المحل الاشتريتو منو
(( طبعا ما ممكن تقول ليهو امك تافها و بتاعت امور و بعدين الزمن دا في مره بغشوها في دهب ) قام وقف علي حيلو زى اللدغتو عقرب و قال ليها معليش يا خالتي ممكن تجيبي لي الدهب ؛ وقفت كريمه و صلحت طرف توبا جدا با ولدي دقيقه بس و طلعت جابت ليهو الدهب بصانديقو
(( طبعا هي بعد رجعت البيت رجعت كل حاجه في صندوقا)) و نزلتم ليهو و طلعوهم لغايه العربيه و الولد دا وشو احمر عديل ؛ معليش عزبتك يا ولدي لكن المواضيع دي ما فيها لعب عشان قروشكم حرام تروح ساي ؛ شكرا يا خاله يلا مع السلام هو فوووو دور شكلو وصل في خمسه دقايق و دخل من برا وشو قالب اللوان و علي حظر لقي امو و اخواتو قاعدات كلهم في الصاله ؛ امي بس سوال وجاوبيني عليهو الجاب دهب رحمه منو؟ يا ولد مالك حتي وشك مختوف كده اقعد ؛ ما داير اقعد بس جاوبيني يا امي؛ جبتو انا منو يعني الجابو؟؟ ليه خير ان شاءالله ما عجب البرنسيسه ولا شنو؟ عاين في امو مسافه و عاين في اخواتو مستغربات شكلهم ماعدا اعتدال مدنقره راسا ما رفعتو و نسيبه تبلع في ريقا ساي ؛ امي الدهب دا فالصو ؛
نعم قلت شنو ؟ دهب شنو الفاصو يا ولد انت دا كلام شنو؛ زي ما سمعتي الدهب فالصو ؛ وانت جبتا الكلام دا من وين و زاتو العرفك ب فالصو و ما فالصو شنو؟ ؛؛ امي خالتي كريمه مشت تضيق غوايش رحمه و الصايغ قال ليها الدهب دا فالصوو ؛ قامت المره اتنفضت علي حيلا ؛ خلخاله التقلع ضروسا ان شاءالله المره الناقصة قصدها حراميه انا يعني؟ حراميه هي عشيرتا كلها شالو الدهب غيروهو ودايرين العبو علينا

موضوع: رد: رواية رحمة الجمعة أبريل 10, 2015 12:46 am

قامو البنات نطو اهدو في امهم ؛امي اهدي امي ما كده امي الضغط و و و. و عماد اعاين ساي ؛ امي اول شي خالتي كريمه ما قالت عليك حراميه ولا اتهمتك ب شي ب العكس هي قالت الناس الاشتريتو منهم الدهب غشوكم و بتحصل عادي اسي اني هايجه مالك و نقنق نقنق نقنق من الجهات كلها بعد قريب الساعه من النقنقه هوي يا عماد انا اول مشيت معاك عشان ما اكسر خاطرك ( خافت العفنه من الطلاق) لمن اسي البت دي ما بتدخل علينا اصلو و اهلا الحراميه العينم فارغه ديل ما بنفعونا ولا مستوانا ؛ امي لو سمحتي رحمه مرتي مافي داعي للنبز و اسي نهايه الموضوع دا عليك الله بس جيبي لي الفواتير الاشتريتو بيها الدهب وانا بتصرف مع ناس المحل بطريقتي

موضوع: رد: رواية رحمة الجمعة أبريل 10, 2015 12:46 am

عماد بعد اطمن علي امو انها كويسه و رقدت نامت جرا رزان برا الاوضه و ساقا من يدها وداها فوق الاوضه و قفل الباب ؛خليك واضحه معاي يا رزان امي عارفه موضوع الدهب دا و بتعمل كده عشان ما دايره رحمه ولا بجد غشوها؟ قالت ليه والله العظيم انا الموضوع دا ما عندي اي خبر عليهو سمعتو اسي وكت انت جيت هايج من بره لكن الانا عارفاهو انو امي و اعتدال و نسيبه هم المشو جابو الدهب سكت مسافه وقال ليها امشي نادي لي نسيبه سريع و بعد دقايق جات نسيبه طالعه تنقنق الله اقطع رحمه و اليوم الشفتها فيهو امي دايره تموت بسببم ؛اسكتي و اسمعيني كويس يا نسيبه ما حاعيد كلامي البسي عبايتك وأطلعي قدامي اسي و رفع تلفونو عمل روحو بتكلم ؛ آلو يا جنابو كيفك ،،اي خلاص انا اسي بجيب اختي و نجي نغشاك نمشي لمحل الدهب الحراميه؛ بس نسيبه دي بقت ترجف قفل الخط و قال ليها سريع امشي البسي عبايتك قالت ليه انا مالي انا ما بعرفو وين ؛ يا زفته ما تكضبي انتي و اعتدال مشيتو مع امي يلا سريع الراجل مستنينا ؛ جرت نزلت تحت ل اعتدال ووب الحقيني اخوك ضرب ل بتاع شرطه واسي قال نمشي لمحل الجابو منو الدهب بس طلع من ورآها ارح اطلعي سريع اعتدال قالت ليه يا عماد الناس في شنو وانت في شنو امي تعبانه وانت ساكي الفارغه ؛ قال ليها دهب ب ٣٠٠ مليون بقي فارغه يا اعتدال؟؟ بعدين الموضوع دا اقفليه بس واحده فيكم تجي توريني دا ياتو محل و انتو ما عليكم ب الباقي انا بتصرف قالت ليه يا عماد الموضوع دا خليه قال لها انتو م خليتو لي حل تاني و رفع التلفون ضرب ل ابوه ؛آلو يا حاج كيفك اي موضوع الدهب اسي معاي اعتدال و نسيبه و حاسوقم نمشي المحل مع جنابو احمد الرسلتو انت .. لالا ما احتاج انت تجي لكن انا بوريك البحصل خلاص تمام اي حاضر و قفل الخط
(طبعا هو اصلا ما ضرب اي تلفون ابوهو ما عارف موضوع الدهب اصلا) و البنات ديل بقو ارجفو و نسيبه انهارت بكي قالت ليه والله انا مالي دخل امي قالت لي محل الاكسسوار البتجيب منو مني صحبتك وين وانا وصفتا ليها والله ما لي دخل يا عماد و اتفقعت بكي هو فهم الحاصل كلو و قال ليها يعني كسرتو لي عيني قدام اهل مرتي و طلعتوني حرامي وأهلي حراميه .. ما اتوقعتها منكم لكن أسمعوني كويس و وصلو الكلام ل امي عرسي في مواعيدو دايرين تجو اهلا و سهلا ما دايرين انتو حريين و انا البيت دا ما بيتي تاني و ما داخلو و طلع لقط كم حاجه من فوق و كم لبسه ومرق و رزه الباب ...

موضوع: رد: رواية رحمة الجمعة أبريل 10, 2015 12:47 am

مرق لفا ب العربيه مسااااافه و بعد داك مشا وقف في شارع النيل شرب كبايه جبنه و ضرب ل كريمه قال ليها موضوع الدهب دا انا حليتو خلاص و بجي المسا ان شاءالله قالت ليه البيت بيتك يا ولدي و دور مشا بيت ريم ست الحريم لقاها طبعا مافيشه دخل فوق اوضه الضيوف طوالي رقد اتغطي ونام ما صحي الا العشا نزل تحت لقي ريم وابوهو قاعدين اشربو في شاي سلم عليهم هم طبعا الاتنين ما قايلنو قاعد و وشو منفخ و شعرو منكوش و قميصو مكرفس باين عليهو كان نايم : عماد حيت متين ؛جيب قبيل يا ريموو لكن كنت تعبان طلعتا نمتا طوالي قالت ليه نوم العوافي اخت ليك عشا (قصدها اكلم الشغالات اجيبو ليك العشا) لالا انا طالع مواعيد مهمه لكن برجع بعدين قالت خلاص تمام قام مده وقال ليها دقيقه بس يا ريموو داير ابوي و ارجعو ليك تمو الخلط قعدو اضحكو و قالت ليه خلاص اقعد انا طالعه اشوف البنات و خلتم وطلعت جا عماد قعد جنب ابوهو وحكي ليهو الحصل ب اختصار قال ليه انا مفروض أمشي للجماعه ديل بعدين احل الموضوع رايك شنو ؟ قال ليه دي فضيحه دي يا ولدي و الكلام دا كان طلع برا سعتنا حتبقي علي اي لسان قفل الموضوع دا سريع ؛ قال ليه انا حاشيل من حساب الشركه لانو دفتري وقف ؛ مافي مشكله المهم قفل الموضوع دا سريع خلاص اعتبرو انتهيا يا حاج و قام اتحرك بً قميصو المكرفس داك و اتحرك علي الصافيه و هناك ضرب لعبد الرحمن جا فتح ليه و دخلو الصالون ونادي كريمه و أراها ظرف وقال ليها موضوع الدهب القديم انا اتصرفتا مع الناس خلاص وانتي ظبطي موضوع دهب رحمه يا خالتي و طوالي طلع علي كده و هي ما حبت تحرجو زياده و ضربت ل رقيه حكت ليها و طبعا رقيه كانت دايره تتفشي في الجماعه لكن خلاص سكتت عاشت خاطر اخوها و بتو

موضوع: رد: رواية رحمة الجمعة أبريل 10, 2015 12:47 am

المهم ما كان في درامات تزكر تاني غير انو نزلت رحمه و رقيه و كريمه جابو دهب رحمه و شالت سته مليون إدتا ل امال المسره تعمل ريحه ل رحمه (دفقت الريحه الجاهزه الجابوها و قالت اصلا بعد حركتم دي ما بتضمن اكونو خاتين ليها مصيبه في الريحه و عدا عن ذلك ما مرت الايام من غير اي درامات تزكر و جا يوم العرس و ما ادراكما يوم العرس دا خلوهو بكره اكون راااايقه ف انتو حضرو التياب و فساتين السهره و بغشاكم نبقي مارقين علي قصر القيروان يلا تصبحو و الملايكه حارساكم

موضوع: رد: رواية رحمة الجمعة أبريل 10, 2015 12:47 am

اخليكم تجهزو للعرس و انا حاركب الطياره و امشي امريكا سريع يا قلبي مافي زمن ياداب نلحق المطار مع زحمه الشارع و المطر دا ؛ حاضر حاضر حبيبي خلاص طلعتا و مسكا و اتحركو علي المطار و تما عزيز الإجراءات و قعدو مستنين نداء الرحله .. حبيبي دايره ادخل التواليت ; طيب ما تتاخري ؛اسوي شنو دا ولدك دا جنني و قعدت تضحك ابتسم وقال ليها الله احفظو و احفظ امو يا رب و بعد ربع ساعه كانو في الجو خلاص بعد عده ساعات اغلبا قضوها نوم طبعا وصلت الطياره مطار القاهره علي ٤ عصر و طيارتم التانيه الساعه ٥ لمطار الخرطوم و الحمدلله وصلت الرحله ب سلام و وصلو احلا عرسان لمطار الخرطوم بعد غياب طال كتير و معاهم كتكوت صغنون شايلاهو امو جوا بطنها وطبعا ما كانو زول كانو عاملنها مفاجاه و صاحب عزيز الانتيم هشام كان مستنيهم في المطار و طلعو اتحركو علي الصافيه الكلام دا كان علي ١٠ بليل تغريبا طبعا البيت جايط مافي زول جايب خبر و رحمه عند غاده شرفي عندها شيل وش و حواجب و جلسه نضافه و بعدها طلعو اتعشو اخر عشا عزابه نخليهم في جوطتم و نمشي البيت طبعا وصلو و عم عبدو الغفير فتح الباب و دخلو الشنط و زول جايب خبر مافي و دخلو براحه الصالون من الباب البره في وشو لقي حاج محمد كان بصلي و ياداب انتهي و رفع مصلايتو و بس شاف عبد العزيز حضنو بعض و دموعو دي عشره عشره و سلامات و عزيز اشيل و ابوس في راس ابو و في يدو و شويه انزل ابوس رجلو و سلم علي سحر و قام حاج محمد كورك كريمه كريمه قامت جات تشوفو مالو لقت عزوز في وشها و جرت قبضتو عليها وتبكي و قبضت سحر ب اليد التانيه حضنتم وتبكي و تزغرت و شويه شويه جو ناس البيت اشوفو في شنو و السلام و الأحضان و البوس و الما كان عارف ب حمل سحر بارك ليها و في نص الونسه ديك جا عبودي قال ليهم اسكتو ناس رحمه جو انا بجبيم هنا وانت يا عزوز ادسا و فعلا جا ماسك اخواتو كل واحده من يد و جاريهم و هم مخلوعات في شنو في شنو ما فاهمات شي و دخلو الصالون لقوهو ملان ما بيت عرس كمان و ما فهمو حاجه والناس اعاينو ليهم و اتبسمو ساي و فجاه جا طالع عزيز في وشهم و الكواريك والصريخ و الزغاريت تاني اشتغلت و رحمه دي ساعه معلقه في رقبتو وتبكي و النقاب وقع و الطرحه وقعت وحالا أسفه و بي حراق الروح فكوها منو حتي وعت سلمت علي سحر و حضنتا مسافه و بعد قعدو اتونسو شويه قام عزيز استازن من ابوهو و ساق سحر و كريمه ومشو شقه ناس اهل سحر النازلين فيها عشان سحر تسلم علي امها و اخوانا و قعدو معاهم و خلو سحر تبيت مع امها و رجع عزيز وكريما البيت عشان ارتاحو واجهزو ل يوم بكره طبعا من ما وصلو البيت كان حاج محمد نام خلاص لانو بقوم الساعه٣ اصلي كريمه سلمت عليهم و طلعت تنوم و عزيز مشا اوضه رحمه و جدعو مرتبتين في الارض لصقوهم لانو حبوبه سيده و عمتو رقيه بايتات في السراير فوق وهو رقد في نص المرتبتين و اسلام ب جيها و رحمه ب جيها و الونسه دورت لغايه ما نامو
يلا انتو ️ كمان نومو بكره يومنا طويل تصبحو علي خير

موضوع: رد: رواية رحمة الجمعة أبريل 10, 2015 12:48 am

الجو مغيم من الصباح بدري الشمس ما طلعت لسه حاج محمد و كريمه قاعدين في الصاله تحت اتونسو براحه براحه عشان ما ازعجو الناس النايمه هنا و هناك بعد صلو ركعتين سوا ؛ ام العروسه والله انتي الليله زاتك عروسه وشك منور زي القمر و هي تتبسم والله يا محمد انت اصلو ما بتكبر دايما ياهو كلامك حق اول ايام عرسنا ؛ انتي الواحد ما بكبر معاك دايما ترجعي الزول شباب و اشوف وشك الصبوح دا روحو تتردا ؛ الله اخليك لينا و ما احرمنا منك يا رب ؛ و انتي كمان ان شاءالله يا سبب فرحي ضحكت و قالت ليه يلا قوم عشان تلحق الصلاه في الجامع و انا ماشه ارمي اللقيمات و جات تقوم مسك يدها و قعدا جنبو تاني داير اقول ليك بس جات داخله رقيه ؛ صباح الخير يا راجل ما تخجل بتك بقت عروس و انت ماسك المره تغازل فيها من الصباح ؛ ههههههه و كريمه دي تضحك ساي قالت ليها انا زاتي قايمه ارمي اللقيمات ؛ لقيمات شنو يا وليه اقعدي مع راجلك اللقيمات قايمه عليها انا ؛ لا والله قايمه انا؛ والله تقومي بكره اجيب ل اخوي عروس اصلو لسه شباب و داير اتونس و انتي خلاص عجزتي بعد دا و استمرت المشاغله الظريفه وفي الاخر حاج محمد وقف و قال ليهم قومو انتو الاتنين انا ماشي الجامع اسمعو ليك صوت طولو منو شديد ابوي دقيقه اتوضا ماشي معاك و جا عزيز باس راس امو و عمتو و دخل اتوضا و دعواتم لاحقا هو و بعد اشويه جا جاري عبودي لابس جلابيتو و متوضي حلاه الدنيا عليه و طلعو مع ابوهم الجامع و ديل دخلو أرمو لقيماتم و اجهزو شاي للامه النايمه جوا دي.. علي الساعه ٧ نزلت اسلام تحت بعد صلت و قعدت شويه مع امها و ناس البيت والاهل و ٨ تلفونا ضرب ؛الو السلام عليكم ، آلو وعليكم السلام سومه صباح الخير ان شاءالله آكون صحبتك

موضوع: رد: رواية رحمة الجمعة أبريل 10, 2015 12:48 am

طبعا القصه دي حصلت قبال مدام غاده ترحل محلها الجديد لسه كانت في عماره ناس امها )) رحمه نزلت من العربيه شايله الشنطه الجراره حقتا الحضرتا اسلام من امس( فيها الروب و الصابونه و الليفه و الاندروير حق العرس و فرشه الأسنان والمعجون و كم عود صندل عشان تتبخر و لبان و بخاخ فم و علبه فيها عجنه كده ريحتا دمار شامل و علبه الاكسسوار و الشبط و علبه اللينس و المحلول و القطره حقت العيون و بخاخ الازمه و بندول ((اها قصرتا معاكم يا عروسات ما تنسو شي تشيلوه معاكم الكوفير )) طلعت لقت سميه البت الظريفه الفي الاستقبال و طبعا اصلا رحمه و شلتا زبونات من زمان فبنات المحل كلهم صحباتا قعدت شويه أخدت نفسا و اتونست مع سميه شويه و دخلت جو الاوضه ختت شنطتا كان معاها عروسه واحده اليوم داك بنوته كيووت كده اسمها تبيان و اتلاقو كم مره في جلسات الفيشيل و شيل الوش و كده قعدت اتونست معاها شويه و قالت ليها ادخلي استحمي انتي اول فعلا دخلت و رحمه قعدت شويه تفكر الليله حاطلع كيف تلفونا ضرب ؛آلو عبوره وينك انتي ما جيتي لسه ؛انا وأقفه مستنيه الطلبات تخلص و جايه عليك؛ خلاص حبيبه اعملي حساب العروسه المعاي عليك الله و قفلت الخط بعد اشويه جات عبير و استنو تبيان تطلع و نادو بنات الكوفير الاعتزرو ب ظرافه كده لانو اعتقد ممنوع عندهم اها صحباتنا قعدو فطرو و لملمت عبير الحاجات و تبيان دخلت الكوفير جوا اغسلو ليها شعرها و استشوروهو ليها و رحمه دخلت الحمام استحمت و ادعكت براحه براحه لانو لسه اثار شيل الحلاوه قبال يومين قاعده ما دايره تسلخ جلدها عاد هي ما كمان مجتهده في روحا شديد) و عملت الدلكه ولا العجنه ديك و اتشطفت ب المويه و طلعت اتنشفت و لبست الروب حقها و طلعت لبست عبايه و صلت الضهر و دخلت الكوفير جوا و بدو استشورو ليها شعرا كانت تبيان خلاص خلصت و جات قعدت تتونس مع رحمه بعد شويه حات داخله مدام غاده
(نضيفه يااااااخ الزوله دي قاشره ليك ب بنطلونا الابيض علي برمودا طويله و قميص اخضر كم قصير و شبشب دبابه بني ) سلمت عليهم و ساقت تبيان و دخلو اوضه المكياج ألجوا جنب السلم ديك .. بعد اشويه جات داخله اسلام بعد عملو ليها شعرها في باريس غاليري و قعدت مع رحمه شويه و قالت ليها انا حامشي البيت عن اسماعيل تحت و بنكون معاك ٥ عشان نمشي الاوت دور حلو و قرت عليها و حصنتا و طلعت مشت و تبيان خلصت المكياج و طلعت حلاتاااا و كيووووت و طلعت تلبس و دخلت رحمه للمكياج

موضوع: رد: رواية رحمة الجمعة أبريل 10, 2015 12:48 am

خلونا نمشي الصافيه نشوف الحاصل هناك شنو طبعا البيت ماشاءلله تبارك الله (فل هاوس) و اسلام و هبه الله و كم بنت من بنات اهلم قاعدات البسو نخليهم و ندخل اوضه رحمه كانت فيها اسلام سبحان الرحمن الصور البت دي لابسه ليها فستان بينك علي مشمشي مشغول الصدر كلو ب الكريستال و جاي ماسك لغايه نهايه الخصر و بعد داك جاي كانو فستان عروس فيهو نفشه حلوه شديد كم طبقه حقت تل و فوق شفون حريري و طويل و ورا شويه فيهو حركه ديل وطبعا هي طويله اصلا و جسمها مقسم ماشاءالله و تحت لبست جزمه فضيه مشغوله ب كريستال زي حق الفستان و كعب صغنون لانها طويله اصلا و لابسه طرحه بنفس قماش الفستان المشمشي و محجباها ومعاها سلسل كريستال البتلبس في الجبها عرفتو الحركه و جات عزه عملت ليها المكياج شدو وردي و فيهو لمعه فضي و كحل اسود و ماسكرا تقيله و روج وردي و بلشر خفيف مشمشي و لمعت ليها الروج ب غلوس فضي رهيب وطبعا هي مشت الكوفير شقرت حواجبا لانو موضوع شيل الحواجب دا عندها فيهو وقفه.. ولبست طقم كريستال جابتو ليها سحر من امريكا رهييييب عباره عن خاتم و أسوره و طبعا السلسل لبستو في جبهتا قلنا و الحلق اصلا ما ظاهر لانو محجبه الطرحه و طرحتا زاتا الجدعه حقتا مشغوله كريستال نفس الفي الفستان ب اختصار طلعت خياااااال ... اما كريمه لبست ليك التوب المشمشي المشغول كريستال دهبي و طرحه الحجاب من تحت التوب والكارينا زي لون التوب و الاسكيرت و لابسه ليك الدهب و ناقشه الحنه الما خمج و الشبشب المشمشي غايتو مبالغه والله تقول عروس و سحر عملت ليها مكياج خفيف ب الغصب طبعا الباقيين طبعا كلهم قشرو و صحبات رحمه قاشرين كلهم ب اللون الوردي ((شباين و كده)) و سحر و فدوي قاشرين ب التياب المشمشيه برضو تبع الشباين و معهم هبه بت رقيه اها الساعه ٥ الا اتحركو في عربيتين واحده سايقا راجل فدوي فيها فدوي و مها و زينب و التانيه سايقاها عبير فيها عبير طبعا وهبه و اسلام و سهي صحبه اسلام من المدرسه و ⌚️٥ ب التمام و الكمال كانو تحت كوفير غاده شرفي و طلعت اسلام و عبير ل رحمه فوق و بعد دقايق جات تلاته عربات رهيبات اتنين بتاعيين اصحاب عماد و الاخيره الليموزين البيضا الطويله ديك و نزل منها عماد و وقف تحت مستني اسلام تجي تناديهو عشان اطلع انزل رحمه و دقيقه كده جات اسلام نادت و طلع السلم مدنقر و في نهايتو رفع راسو

موضوع: رد: رواية رحمة الجمعة أبريل 10, 2015 12:49 am

كده بعد رحمها قعدت في كرسي المكياج البشبه كراسي دكاتره الأسنان ديلاك و غاده طبعا تتونس معاها و قالت ليها يا رحمه انا دايراك تسترخي شديد و تسيبي لي روحك لانو انا متصوره ليك شكل رهيب و طبعا اصلا رحمه ليها كم سنه زبونه غاده و عارفه شغلها كويس واصلا غاده هي الصممت فستانا يعني عارفا كل شي فقالت ليها اخدي راحتك يا مدام و غمضت و حاولت تسترخي غاده ظبطت الكنتور مباااااالغه طبعا بس عشان تظهر أضاءت الوش ما اكتر لانو رحمه وشها ما محتاج تظبيط شديد و عملت ليها الفاونديشن الما معروف مكس مع برايم مع بيز مع شنو ب الظبط و ظبطت ليها اي لاينر خرافي و طبعا الحواجب من امس شالوهم و صبغوهم تاتو موقت بني غامق و لونت حفن العين كااامل ب نفس درجه الوش و لخبطت كم لون حق شدو مع بعض طلع دهبي مع مشمشي و مدرج اغمق لغايه نهايه طرف العين و رسمت العين تحت ب قلم ابيض كبرت العين زياده اكتر من ما هي كبيره ماشاءلله و تحتو خططت ب بني محرووووق مائل علي اسود و رسمت العين من تحت خفيف و رجعت تاني رشت دهبي غليتر خفيف علي جفن العين من قدام و النهايه و عملت مكس ب الفرشه الصغنونه ديك و ركبت الرموش قبيل طبعا و عملت ماسكرا خفيفه بس عشان تظهر الرموش انا ناتشرال و بعد داك رجعت رسمت عضمات الخدود ب الكنتور وحددتا ب بلشر وردي خفيف لون طبيعي اسمو اعتقد و وزعتوب فرشه الوش الكبيره و خططت الشفايف ب لون ما بين الوردي و البيجي وبالفرشه و رسمت الروج رسم ب الوردي الرويان و عملت غلوس لحمي و في نفس الوكت مثبت للروج.. غايتو كانت عباره عن لوحه ما وش ماشاءالله قامت غاده بعدت شويه و أدت المكياج نظره من كل الزوايا و رجعت عملت شويه لمسات بس و خلصت المكياج و طلع دمار شامل قنبله صاروخ ماشاءالله غايتو غاده زاتا من كترت ما اتكسرت حنستا عديل انها تصورا و اختها موديل( وطبعا كلنا عارفين انو مدام غاده صعب تحنس زول) و فعلا رحمه وافقت لكن اشترطت عليها تعرضا داخل المحل بس ما تختها في قروب النت و الصوره ما تطلع خالص و غاده وافقت طبعا بعد داك مشت لبست الفستان الهو عباره عن عالم جميل ( الفستان اول شي عباره عن اوف وايت لونو جاي ما فوق شكل قلب و فوقو (v شيب كوله من الكتف الكتف و حتي ماااااسك في الجسم لحدي الخصر و منفوووووووش طبقات و من ورا ديل طويييييل علي شكل دائري الفستان من فوق كلو مشغول ب اللولي الدهبي و البيجي تلاته أحجام و الكريستال الدهبي وحجر بيجي و شويه ترتر برضو عشان ادي لمعه بيجي علي دهبي و نفس الشغل دا في ديل الفستان من ورا اللفه الدايءريه كلها و لابسه معاهو جونتي طوييييل فرق بسيط من الكتف زي حق ساندريلا داك و فوق مشغول بنفس شغل الفستان و لبست شبط عاااالي سيور ماسك لغايه نص الساق اوف وايت و فيهو كريستال و مرايات و لولي دهبي لبست خاتم كريستال دهبي و حلق علي شكل دوائر ماسكه في بعض ب الطول من الكريستال الدهبي و وقفت في البخور شويه و مشت قعدت للتسريح طبعا عملت تسريحه ساندريلا زااااتا لو دارين تشوفها في غوغل و من قدام بف و مرفوع ب تاج عالي حق كريستال دهبي و لولي بيجي غايتو التسريحه براها أخدت زمن و كانو اسلام و عبير وصلو ومستنينها في الاستقبال و طلعت غايتو الناس كلها بقت تشهق و اسلام طوالي جات تحصن فيها و اتصورو كم صوره و نزلت نادت عماد و طبعا قبيل وصلناهو لغايه طلع السلم و وصل الباب و رفع راسو شاف رحمه بقي فاتح خشمو و مفهي دا ب الظبط كان تعبير وش عماد و طبعا نسي الناس كلهم و مشا خمشا و باسا في راسا و يدينا و قرب اشيلا و اجري و هي خلاص ماتت من الخجل غايتو بعد مسافه اتماسك و اتصورو كم صوره و نزلت عبير تزغرت و نزلو باقي البنات ازغرتو و نزلت اسلام و بس تحصن فيها و بعد اشويه جو نازلين غايتو مبالغه هي بقشرتا ديك كلهااااا و عماد جنبها زي الطالع من فيلم تركي لابس البدله السودا و القميص الابيض و الببيونه السودا و حالق الشعر و السكسوكه تقول يا ليل واللون دا قمحي فاتح و طبعا رحمه ضربتو ضربه ب اللون بقت حلبيه عديل ( غايتو كان في بنات حضروها من ايام المدرسه مافي داعي القطيعه ) اها ركبو العربيه و اتحركو علي مزرعه ناس عماد و السيره دورت و كل شويه رحمه تتلفت زي الرايحه ليها حاجه بعد اشويه تجي عربيه جنبهم و افتحو القزاز و اطلع عبودي ب الشباك و معاهو تلاته اصحابو و سحر مرت عزوز و سايق عم اسماعيل و رحمه تضحك بعد مسيره ظريفه وصلو المزرعة كانت عباره عن قطعه من الجنه و نزلو ب بدا التصوير ل رحمه و عماد براهم و الشباين و اصحاب عماد و طبعا جات رزان و اخواتا الأكبر منها الاتنين و ديلاك قعدو مع امهم عشان اتحركو امشو الصاله ... و بعد اشويه الصور الجماعيه و الخستكه و فجاه اجي زول أغمض لرحمه عيونا و البنات اكوركو عشان المكياج ما اخرب و فكلها عزوز و طبعا هو مشا جاب البوكيه عباره عن ورد اوفوايت مرشوش دهبي بسيط و مسكو و قعد في الارض علي رجل واحده قدمو ليها ( بستهبل) و اخدو كم لقطه و اتحركو علي قصر القيروان

موضوع: رد: رواية رحمة الجمعة أبريل 10, 2015 12:49 am

الشباين دخلو علي اغنيه من اغاني اليسا و عملو دايره و الأنوار كلها اتطفت و ركزو الضو علي حته المدخل و اشتغلت موسيقي هاديه و دخلو العرسان و وصلو الدايره و اشتغلت اغنيه ما مصدق اني قدام حبيبي و رقصو الأسلو و الناس دي تصفق و تكورك ساي و بعد شويه اتحركو قطعو التورته و طه سليمان كل شويه اقول ليهم يا جماعه صلو علي النبي( بقي زي قسمه) و طلعو الكوشه و هناك واقفين حاج محمد و كريمه و آبو عماد و سنويه اتصورو كلهم و قعدو و الناس اتلمت اباركو و بعد حراق روح قدرو انزلو المسرح و وصلو الفنان ب قدره قادر و الجبجبه بدت و الحفله استمرت لغايه الأوفر نايت و بعدو الناس اتفرتكت و عماد حلف اصلو ما اسيب رحمه الا اسوقا معاهو و غايتو بعد حراق روح قدرت تزوغ منو و تمشي مع عزوز البيت لانو طبع الرقيص بعد بكره

الرقيص من الصباح رحمه مشت لمشاعر الحنانه معاها عبير قعدت للحنه ما انتهت الا الساعه ٤ العصر رجعت بيت عبير نامت لغايه ما عبير صحتا انو الزوله الحتعمل ليها المكياج جات و سرحت شعرا فاكي علي طولو طبعا و اتحركو طوالي البيت الصق ناس رحمه و هناك جوها كريمه و رقيه و حصنوها و رجعو البيت عشان اقعدو مع المعازيم طبعا اوصف ليكم المحل عشان تقدرو تعيشو الجو مع رحمه ،، فضو الصالون الكبير كلو و في النص عملو المسرح و ختو الكراسي حولينو و طبعا ف النص ختو كرسي قسمه و فرقتا و من اليمين قدام ختو كراسي اهل العريس قعدت سنويه و اخواتا و بناتا و ضيوفا و البنات حايمات عليهم ب الخبيز و المكسرات و الفشار و الحلاوه و كده و طبعا كان في اربعه نسوان عاتيات لقطو ما خلو تلفون حايم لا بعرفو اهل عريس لا عروس (غايتو القرو في الرباط بكونو مرو عليهم زي ناس ساميه و فاطمه البحرسو باب البنات) و طبعا دا غير بنات قسمه البراقبو ديلاك و هي كل شويه تحزر الناس من الموبايلات و طبعا الضيوف جو من بدري و اتغدو و اتعشو و اي شي اها الساعه ٨ جات اسلام وسوست لقسمه ؛يلا يا جماعه اقعدو العروس داخله و عليكم الله ما دايره لي موبايل برا و صلو علي النبي؛ عليه الصلاه والسلام و بدت تدق الدلوكه و تصلي علي النبي كل شويه عليكم الله يا ناس و و و كدي خلينا من قسمه و نشوف رحمه ب الليموني وووب عزاب غايتو يا نهي ماهر ابدعتي( لابسه فستان عباره عن ستان ليموني فاقع ساده ما فيهو اي شي لغايه الركبه (عاد فجاه البت عملت ليها صلب شكلو و الله اعلم مشت لناس ابو مرين) و اكسسوار ليموني ب برتقالي عباره عن افعي كبيره بتجي ملفوفة في الجسم من الصدر و نازله حزام و معاها تاج كبير زي حق الفراعنة و الحجول و الغوايش و الضراعات و الحلق حاجه عجيبه ليها حق الفستان اكون ساده الشبشب البرتقالي و فاكه الشعر بطولو ماشالله مغطي الصلب و التوب تحفه برتقالي و ليموني مشغول كلو خرز ملون و عماد لابس ليك جلابيه السكر سكر والشال و الطاقيه وب علي من عماد و مسكا ساعدا طلعت فوق و قسمه تغني و رحمه تفك تتمايل و شويه شويه بدت تفك التوب و مرقت الشبشب و سهام اتناولتم منها سريع و عماد دا فهي ريالتو قربت تسيل و قدم قدم لقدام قدم عماد العريس ما اضوق الندم( يا يما عماد في عالم اخر) و رحمه تهز ( انا بدق ليك صاجه انا بشتت الرمله) ووب من رحمه و لون رحمه و حنه رحمه و دلع رحمه و شعر رحمه غايتو المكياج ما عجبني صراحه

موضوع: رد: رواية رحمة الجمعة أبريل 10, 2015 12:50 am

ماش جات رحمه مارقه ب التوب الطوبي المشغول ب الترتر الوردي و الفوشي وقسمه تغني و تدق في الدلوكه و رحمه تتمايل و مرقت التوب وتحت التوب حاجه كده عجيبه قطعه كده ب الفوشي سيور سيور مغطيه الصدر و تحت و الصلب و الباقي كلو سيور سيور و حاجات نازله كده زي السكسك و الاكسسوار كلو ورود ورود فوق طوق زي حق ناس هاواي و اسورتين ماسكات من نص اليد لغايه الاصابع و الحجول و مسكات الضراعات غايتو الحاجه الكانت لابساها دي خلت الناس كلها تفتح خشما مع اول ترتيره عماد غلبو الثباتو ازح منها كده و هي تترتر عليهو كده تقول قاصداهو و عريسك غلبو الثبات و مسك جلابيتو عليهو و نزل اتخارج و البنات اصواتم فاتت قسمه ب خلاص مسافر قطع التزاكر و الفاصل انتهي و مشت غيرت ب اخر توب في الرقيص و هو التوب الاناناسي الحرير وفيهو قطع مخمل كحلي معمول بيها شغل حلو مجدع في التوب كلو و الأطراف ودع(صدف) و من جوا لابسه بلوزه حمالات مشغوله ب الكحلي و تحت شورت قصير وفوقو قطعه حرير كحلي ملفوفه فيهو زي ساري الهنود و الاكسسوار كلو عباره عن ودع(صدف) حاجه زي الجدله في الراس من الودع وجنيهات الدهب و اليدين و الحجول نفس الشي و طبعا قدر ما الجماعه حنسو العريس حلف ما ادخل و رقصت الفاصل داك براها و في اخر رقصه طلعو صحباتا كلهم بعد غيرو لبسو فساتين من القرمصيص و رقصو معاها و عادت فلتكانه البرتكانه لاوضه العصابه و بدت مراسم تجهيزا للجرتك و دلكوها و مسحوها و بخروها و صندلوها و لبسوها داك يا الفستان الأحمر العجيب و الدهب حقها و حق امها الله ارحما و سلسل السيموته نازل لغايه تحت الخصر و داك يا توب الجرتك المشغول ب الفصوص و الشبكه الدهبيه مركبه في الراس و جدعه التوب ولبست الجدله الدهبيه نازله من الرشمه ووووب من رحمه ب الأحمر نار منقد بس و ظبطو ليها المكياج الدهبي و الروج الأحمر الفاقع شي عجيب غايتو و غطوها و جا عماد مسكا من يدها واتحركو علي برا و هناك كانو جهزو عنقريب الحرتق في المسرح و الطربيزه الفيها حاجات الجرتق و البرنامج اشتغل و دخلو عزيز و عبودي حضرو الجرتك و طبعا جرتقتا حبوبه سيده مع انو اهل العريس اعترضو لكن رقيه حسمتم اصلا قاعده علي الهبشه هي و دايره سبب و انتهت المراسم الظريفه و الطياره حقت الجماعه كان باقي ليها ٤ ساعات فعماد رجع مع ناس امو البيت عشان اخلي رحمه تجهز و تودع اهلها و طلعت رحمه استحمت و لبست حاجه خفيفه و رقدت و طلعت خالتا ابتسام و طردت البنات وقفلت الباب) و قعدت توصي فيها فحقو نخليها توصيها انحنا ما لينا دخل ب الكلام دا وأخليكم تمشو ترتاحو بعد الرقيص حق رحمه و نتلاقي بكره نودعا في المطار رايكم شنو اها بعد التوصيه قشرت رحمه ب البنطلون القماش الاسود و قميص الستان الرمادي و جكت البدله الفوشي و رفعت شعرها ضنب حصان عاااالي و عملت اي لاينر و ماسكرا و روج فوشي و ختت الطرحه الرمادي أطرافا فوشي في راسا و لبست الهاي هيلز الفوشي وشابت شنطتا اللويس فيتون الرماديه وعلامتا فوشي و ودعت ناس البيت الما ماشين معاها المطار و ركبت مع عزيز و عبودي و اسلام وهبه و اتحركو علي المطار و طبعا عربيه اسماعيل ورآهم ملأنا ناس خالاتا و امها و كده وصلو المطار و اصلا الوكت كان أتأخر شديد و لقو عماد و اهلو هناك و ريم ست الحريم وأصحاب عماد قريب ال ٨ كل واحد احلي من التاني و عماد لابس ليك بنطلون الجينز و التيشيرت الابيض ووب من النضافه و طبا مرتو بعد ودعو الاهل و دخلو جو و بدو الإجراءات و اصلا كانو متأخرين فجري جري خلصو و ركبو البص و اتحركو علي الطياره ولغايه هنا رحمه قايلاهم ماشين مصر ما عرفت انهم ماشين جزر المالديف الا في الطياره طبعا بعد ساعتين الطياره نزلت في مطار الدوحه و كان بين الرحلتين بس نص ساعه ياداب خلصو اجرااتم و دخلو تواليت و اتحركت الرحله الي جزر المالديف غايتو كان في ونسه دقاق في الطياره و مسك يدين و بوس يدين و غايتو طبعا الطياره كلها خواجات ف اخدو راحتم علي الاخر غايتو الشي الفاتنا انو رحمه في مطار الدوحه مرقت الشبط العالي و لبست ليها شبشب زحااف اسود .... شويه كده جابو الوجبه (طبعا ناس الخطوط القطريه ناس راقيين ) والصينية فيها صندوق فيهو ماش بوتيتو(بطاطس مسلوقه مهروسه )و قطعه دجاج و خضار مسلوق و علبه صغنتوته زبده و تانيه مربي و توست و صندوق فيهو تحليه اعتقد جاتوه جوعتوني ياخ طبعا عماد ضرب صينيتو و رحمه حلفت ما تأكل لانو عندها مشكله مع المطبات الهوايه و خافت بطنها تقلب قام عماد حشا ليها التوست ب المربي و الزبده و بعد تحانيس و شكل و انو الرحله طويله غايتو أكلت نصو و بلعت بندولتين نايت و نامت و عماد لبس السماعه و قعد احضر ليهوفي فيلم و يدو في يد رحمه و بين الفينه و الاخري برفعا ابوسا

موضوع: رد: رواية رحمة الجمعة أبريل 10, 2015 12:50 am

وصلو خيرا المالديف مطار ابراهيم ناصر الدولي (جنه الله في الارض) احاول ادخلكم في الموود للجماعه الماكتب ليهم ربنا امشو هناك لسه عباره عن مجموعه بتاعت جزر في المحيط الهندي جوها اغلب السنه ظريف و لطيف بس الرطوبة عاليه شديد .. المهم الجماعه وصلو نزلو من الطياره في جزيره صغيره اسمها (airport island جزيره المطار السكان المحليين او (locals) بسموها هولومالي تغريباو تمو الاجراات و طلعو من صاله الوصول المطار من اصغر المطارات حتي اصغر من مطار الخرطوم سبحان الله و طبعا رحمه محل ما تتلفت يا خواجات يا اما اسيويين و شورتات و حمالات و حاجات خفيفه (طبعا ناس فاهميين الرطوبه الماشيين ليها الا رحمه المسكينه مجبصه ب البنطلون و البدله تقول ماشه تلقي خطاب الرئاسه (فجاه اتزكرتا خطاب الوثبه حق بشه) ماااا علينا المهم طلعو برا و رحمه حتموت من الرطوبه والحر و الشعر بقي حاجه تانيه من بعد الاستشوار و الروقه ديك و البيبي هير خلاص طار فوق و مل تلاته عملو اجتماع طبعا الجماعه ديل وصلو حوالي ١٢ او ١ الضهر يعني الجو لسه ما برد .. المهم عماد مسك رحمه من يدها و ساقا وداها قعدا في كراسي الانتظار و ورجع اجيب الشنط و استلم حجز الرسورت (المنتجع) و خلص الحاجات و جا الراجل المفروض استقبلم و اوصلم المنتجع شال الشنط و سالم و مشو ركبو علي ال سبيد بوت هم و معاهم مره و راجلا شكلهم من شرق أوروبا ... طبعا الجو خيال السبيد بوت شاقي المحيط الازرق علي شكل ٨ و المويه طايره ب الجنبتين و الهوا خرااااافي و ريحه المويه عامله شغل رهيب و جو أبداع وعماد قاعد وخاتي يدو ورا رحمه و حاضنا عليهو و بكوركو علشان اسمعو بعض انتبهت انو المره اخواجيه مركزه معاها شديد قامت ابتسمت ليها طوالي المره شبكتا هاي مي اي اسك يو سمسينغ (هاي ممكن اسالك حاجه )ونواصل بترجمتنا ؛اميد اكيد اتفضلي؛ التاتو حقك عملتي وين قصدها الحنه؛ طبعا رحمه استوعبت انها قصدها الحنه و شرحت ليها انو دا ما تاتو و كده المهم الونسه شويه استمرت انتو هني مونرز وكده و المره ضحكت و قالت ليها انحنا جايين الانفيرسري ال٨ حقنا متزوجين ليهم ٨ سنين و ماشين اعيدو شهر العسل المهم بعد حوالي تلت ساعه وصلو الجزيره (bandos island)

موضوع: رد: رواية رحمة الجمعة أبريل 10, 2015 12:51 am

الجزيره اسمها باندوس (Bandos island) الا سبيد بوت وقف في المرسي العباره عن ممر خشبي طويل و جو راجلين ساعدوهم و شالو الشنط و طوالي اتحركو و جات فتاه فارعه الطول شقراء الشعر خضراء العينين شبه ما لابسه

» رواية الصكوك
» رواية المسؤولية
» رواية ﺑﻨﺎﺕ ﺍﻟﻠﻴﻞ
» رواية ﺣﻮﺵ ﺑﻨﺎﺕ ﻭﺩ ﺍﻟﻌﻤﺪﺓ