رواية رحمة

موضوع: رد: رواية رحمة الجمعة أبريل 10, 2015 12:34 am

دخلت رحمه ختت التلفون في الشاحن و طلعت ليه بجامه سماويه شورت لغايه تحت الركبه و بلوزه كيووت كده مرسومه فيها ماروكو و رفعت شعرا كلو فوق و شالتت مزيل المكياج قشقشت وشها الزي القمرا و مرقت الاكسسوارات حقتا ختتا في صندوق ظريف كده و شالت الاستون مرقت المنكير و دخلت الحمام اتوضت و لبيت جلابيه الصلاه و وقفت صلت العشا و الشفع و الوتر و نزلت لقت اسلام في المطبخ مجهزه ساندوتشات من عشا قبيل و وأقفه جنب المايكرو ويف بتسخن فيهم قامت رحمه شالت ليها كبايتين و كبت عصير من التلاجه و قعدت هي مستنيه اسلام تجي و قعدو اتعشو و اتونسو و حكت ليها و باين علي اسلام لسه ما مقتنعه لكن شافت اختها طايره من الفرح قامت سكتت تسمع فيها اها بعد انتهت قامت اسلام قالت ليها ان شاءالله دايما مبسوطه كده يا اختي و قامت قالت ليها انا طالعه ازاكر شويه و ارجع انوم بكره يومي طويل بعد المدرسه عندي مجموعه فيزياء و برجع البيت عندي درس رياضيات قالت ليها رحمه خلاص قومي الله اوفقك و تجي أوله السودان يا سمسمتي و ضحكو و قامت رحمه قعدت في التلفزون جا داخل حاج محمد عليها و قعد جنبها و مسك الريموت وطا الصوت قامت رحمه طوالي قعدت جنبو قال ليها عماد زول ممتاز موش ان شاءالله ارتحتي ليهو يا بتي ابتسمت رحمه و سكتت شويه( ما من بنات اليومين ديل البقدرو اردو علي ابوهم في كلام زي دا كمان التقول لعبو في التراب سوا) اها هو فهما براها ابتسم كده و قال ليها الله اسعدك يا بتي و عقبال اتطمن علي اسلام كمان قامت ضحكت و قالت ليهو با ابوي بتك ديك دربها طويل شكلها دايره تمسك رئاسه الجمهوريه ابتسم وقال ليها الله اوفقا واحفظا ان شاءالله و سكت مسافه بعدين قال ليها عماد استاذن مني تطلعو يوم الخميس الجاي عشان تختاري دبلتك دنقرت كده وقالت ليها الرأي رايك يا ابوي قال ليه أيا بتي انا موضوع العقد دا ما كنت مقتنع بيهو لكن دي قسمه مكتوبه و اسي العرس ما معروف لسه متين وانا موضوع المرقات و الدخلات دا ما دايرو اي انتي مرتو لكن الاصول و التقاليد معروفه في المواضيع دي و انا اديتو موافقتي ف انتي شوفي عبد الرحمن و اسلام سوقيهم معاك قالت ليهو حاضر يا ابوي قام باسا في جبهات و طلع فوق خلاها سرحانه

موضوع: رد: رواية رحمة الجمعة أبريل 10, 2015 12:34 am

بعد شويه مسكت تلفونا و لقت خمسه مسكولات تلاته من عبير و اتنين من فدوي طوالي رجعت لعبير و بدو احكو الشمارات و هي بتحكي ليها اتزكرت التلفون جرت فرق لقتو شحن خلاص و ركبت الشريحة الجديده و جاتا مسجات ناس زين قامت صورت التلفون و الأنسياله و رسلتا في قروب الشله حقتم و وش القرد المغطي عيونو

موضوع: رد: رواية رحمة الجمعة أبريل 10, 2015 12:35 am

قال ليها استاذنتا من عم محمد نطلع يوم الخميس نجيب الدبل رايك شنو قالت ليهو اي كلمني و سكتت شويه ما عارفه تقول ليهو كيف انو عبد الرحمن و اسلام ماشيين معاهم بعدين قررت تعمل رايحه ولي يوم الخميس احلها الله و هو كمان تقول قرا افكارا قال ليها اسلام و عبودي حاحقنونا طبعا و بقى بضحك هي خجلت شديد بعدين قال ليها بهظر ياخ ديل لو ما شالتم الارض اشيلم في راسي خلاص انا بكلم رزان تجي معانا رايك شنو قالت ليهو طوالي مالو قال ليها التلفون عجبك و الهديه البسيطه دي زوقي انا ب المناسبه قامت خجلت شديد انها من الخلعه ما قالت ليهو شكرا زاتو اسي اقول البت ما عندها زوق قالت ليهو شكرا شديد بجد تعبتا روحك قال ليها يا بت انتي مرتي كمان بتظهري

موضوع: رد: رواية رحمة الجمعة أبريل 10, 2015 12:35 am

نخليهم في حنكم دا و نمشي نشوف كريمه و حاج محمد اها حكي ليها ب الحصل قالت ليهو ما فيها حاجه كان تخليها تطلع معاهو عادي عشان اقدرو افهمو بعض و بعدين الزمن اتغير و رحمه بت واعيه ما عليه خلاف قال ليها اي عارف بتي لكن انا موضوع العقد دا زاتو ما كنت دايرو يا كريمه و المرقه و النزله محسوبه علي البت و ما داير ادي زول فرصه في بتي فهمت كلامو و سكتت شويه قالت ليهو الدكتور قال ليك شنو يا محمد نتيجه الفحوصات طلعتا ولا لسه؟ قال ليها لا ما طلعت هي بتجي من مصر الاسبوع الجاي قالو و بتصلو علي انتي ما تقلقي انا اهو دا زي الحصان ما عندي شي و لو ما اصرارك انا ما كان مشيت فحصتا زاتو سكتت شويه كده وقالت ليهو ان شاءالله ربنا اديك طوله العمر الصحه والعافية واخليك لعيالك و لي يا رب يا كريم قال ليها أمين جمعا يا غاليه قالت ليها مشتاقه ل عزيز شديد اسي الساعه بتكون كم عندهم عادي اضرب ليهو قعد اضحك و طلع الموبايل حقو من جيب الجلابيه و قال ليها عارفك الليله لا حتنومي لا حتخليني انوم كان ما اتكلمي معاهم و بعد جرسين بس ردا عبد العزيز ؛السلام عليكم سيد الناس كيفك ، وعليكم السلام كيفك يا ولدي و كيف سحر و بعد السلام و الأخبار سريع سريع هاك امك كريمه دايره تسلم عليكم و أداها التلفون و مرق مشا علي اسلام لقاها قاعده تزاكر قعد معاها شويه و دعا ليها دعوات كتيره ربنا اوفقا و احفظا (امييييين) و سالا اختك نامت قالت ليهو لا نا اعتقد اسي سامعه صوتا بهنا و سكتت شويه كده و قالت يا ابوي اسي انتي صحي موافق علي موضوع زواج رحمه اسي قبال تخلص جامعتا ؟ يا بتي اختك اسي مرت راجل يعني اسي كان قال دايرا في بيتو ما بقدر امنعو اسوقا و بعدين عماد زول كويس ما بقصر مع اختك ما تخافي عليها و ربنا اطمني عليك انتي زاتك يا اسلام و قام باسا في راسا و مرق وقف جنب باب الاوضه اسلام تشبه امها المرحومه شديد نفس اللون و الشعر حتي نفس الصوت سبحان الله و رفع يدو دعا ليها ب الرحمه و المغفره و مشا اتوضا اصلي ليهو ركعتين .. بهناك رحمه لسه مع التلفون قال ليها بتنزلي الجامعه متين (كانو في اجازه السميستر ) قالت ليهو الاسبوع الجاي ان شاءالله قال ليها خلاص تاني انا الحرجعك البيت اعملي حسابك قالت ليهو خلاص كلم ابوي انا ما عندي مشكله قال ليها عم محمد خليه علي و سكت شويه كده قال ليها اخليك تنومي اسي و ان شاءالله بكره نتكلم قالت ليه طيب تصبح علي خير و مره تانيه شكرا علي الحاجات قال ليها تستاهليهم حبيبتي يلا تصبحي الملايكه حارساك ملاكي و قفل الخط .. البت دي أخدت ليها سرحه كده و قامت اتغطت و فمضت سرحت في شكل حياتا الجايا

موضوع: رد: رواية رحمة الجمعة أبريل 10, 2015 12:36 am

يوم الخميس جا سريع و اسلام تنقنق اسي انا دخلي شنو اطلع معاكم انا فاضيه ليكم انا عندي قرايه ما ممكن ياخ كده و كريمه تضحك قالت ليها يا بتي اطلعي مع اختك غيري جو و كلها ساعتين الله ارضي عليك ما تكسري ل اختك فرحتا اول مره تمرق مع راجلا ؛انتي اامري يا ست الكل و كفايه علي دعوتك الحلوه دي مع اني الليله ما سمعتها رفعت كريمه يدينا فوق و دعت من قلبها الله اوفقك وًانجحك و احفظك من كل شر وأفرج قلبي بيك و اشوفك احسن واحده في الدنيا دي قامت اسلام باستا وقالت ليها تسلم يدك علي احلي لقيمات يلا انا مارقه عن عم اسماعيل بكون اسي زهج من قبيل مستيني في العربيه و جرت طلعت .. علي الساعه ١١ كده صحت رحمه جسمها مكسر كلو زي العندها بدايه التهاب رفعت التلفون عاينت لقت رساله ((صباح الورد الفل و الياسمين و الجوري علي احلي ورده عطرت حياتي ما تنسي داير لي دعوه حلوه من احلي رحمه)) أتبسمت براها لانو دا كان الحال من يوم جا اتعشي عندهم و جاب ليها التلفون كل يوم الصباح تلقي رساله منو و المسا تلفون سهره صباحي وخلال اليوم كم رساله و تلفون سريع كده (حب اول ايام داك) قامت رسلت ليهو صباح الخير ربنا اسهل ليك طريقك و اوفقك يا رب

موضوع: رد: رواية رحمة الجمعة أبريل 10, 2015 12:36 am

قامت رحمه نزلت فطرت سريع وقالت البيت فاااضي مافيهو زول اتزكرت اللبله اجتماع أولياء الامور في مدرسه عبد الرحمن ف اكيد كريمه مشت و أسلام في المدرسه و ابوها في شغلو بس هي و البت الشغاله و راجلا عم عبدو الغفير فتحت التلفيزون شويه لقت مافي اي موضوع اتزكرت تلفونا التاني طلعت فوق و فتحت الواتس اب لقت ليك كميه من الونسه في قروب الشله قعدت تقرا و تشوف الفاتا شنو من الشمارات لانها طولت اغلب الونسه كانت عن تجهيزات عرس فدوي و انو خلاص يوم الأحد الجامعه حتفتح و طبعا اخر اخبار الخلطات و الكريمات و شمارات بنات الجامعه المهم اتونست معاهم شويه كده و كانو مارقات ماشين أوزون نظام خميس و كده و طبعا صحبتنا ما فاضيه الليله برنامجا ملان المهم خلتهم في ونستم ديك و قامت تنكت الدولاب تجهز في لبست بعدين و لفلفت الشعر ما خلت رواله حايمه في البيت و طبعا قلتا عندها بدايه التهاب والجسم مكسر وعم اسماعيل مع كريمه برا البيت ولا كان مشت الكوفير اها جلطت الوش ب الكريم و طفت النور و بلعت بندول نايت ورقدت نامت ما صحت الا علي صوت كريمه بتنادي الغدا قامت غسلت وشها و اتوضت و صلت العصر و الضهر و نزلت تحت لقت ابوها و كريمه و عبدالرحمن وإسلام و عمها ابوبكر قاعدين خلاص دايرين اتغدو سلمت سريع و قعدت تنقد ساي في الاكل
( عياااانه قلنا نا عندها نفس للأكل) حاج محمد قال ليها عماد ضرب قال بجي اسوقكم بعد صلاه المغرب ان شاءالله و أتلفت علي عبدالرحمن قال ليه اعمل حسابك دي اخر مرقه ليك الشهر دا لانو سمعتا انو حالك في المدرسه ما ياهو و عامل لي فتوه علي اولاد المدرسه التانيه كمان !! حسابي معاك بعدين لامن ترجعو قام عبدالرحمن اطنطن يا ابوي انا ما غلطتا اولاد المدرسه الجنبنا بجو جمب مدرستنا و اكاوونا و اخر شي الولد داك قال لي حنكوش و ما راجل دايرني اخليه يعني احقر بي
ابوبكر نطه طوالي بضحكته العاليه ديك قال ليه والله يا محمد ما ليك حق تشاكلو من شابه اباه فما ظلم انت نسيت بطولاتك زمان ولا شنو (اتاريها خربانه من كبارا) المهم الغدا و اللمه الطريفه ديك انتهت و رحمه طلعت تجهز للطلعه طبعا قبيل قلنا ما خلت شي في الدولاب ما طلعتو جربتو في النهايه دخلت استحمت تمااااام حمام العيد بس و مرقت قشرت ب السمر دريس النمري و الشبط سيور دهبي ماسك في الرجل و كعبو صغنتوتي و هاف جكت بني من درجات الفستان و رفعت الشعر ب شباصه و من قدام ظبطت القصه (بضم القاف الغره يعني) نزلتا ليك ب الجنبه و عملت ليك المكياج شدو بني محروق والعين قدام دهبي الطرف البعيد للعين برضو و تقلت الكحل اسووووود و الماسكرا طبعا و لبست العدسات العسليه و عملت الروج الوردي و ادتو مسحه غلوس سكري خفيف و خلت بلشر و بدره (طبعا ما محتاجه تجتهد مع كنتور و حركات الوش براهو موزون ماشاءلله ) اها بعد قشرت لبست انسياله عماد و سلسل طويييييل دهبي و حلق دهبي نفس السلسل و ضربت ليك داك يا المنكير البني محروق مع النضافه واللون حاجه كده ما تخلص و شالت ليك شنطتا الدهبيه ب الاسود و مشت علي اسلام تشوفا لانو المغرب خلاص علي وشك لقتا قاعده تقرا و لابسه ليها بنطلون قماش اسود واسع شويه ما مجبص و تونك فوشي بالفضي و مغسله وشها قالت ليها قومي مافي وكت أتلفتت اسلام عليها وعلينت ليها مسافه قالت ليها حلاتك ماشاءلله انا ما عندي شي لابسه بس بلبس طرحتي و جزمتي و المغرب اذن اصلا رحمه الحريفه متوضيه عشان ما تخرب المكياج صلو و نزلو تحت مستنين عماد

موضوع: رد: رواية رحمة الجمعة أبريل 10, 2015 12:37 am

حاج محمد جا داخل و معاهو عبد الرحمن و عماد شكلو لاقاهم و هم طالعين ومشا صلي معاهم في الجامع اها دخلو و جابو ليهو العصير و قعد اتونس شويه و استاذن و ساق الجماعه و مرقو طبعا عبد الرحمن الملقوف كان مستلم الونسه كلها و لا خلو كوره لا خلو جون سينا و البنات اتوسوسو ورا ما معروف بقولو في شنو
اها وصلو العمارات الشارع الكبير الورا لذيذ داك اسمو راح لي ألفيهو داماس (فرمال او الولد دا شكلو ما عارف غيرا) اها وصلو و نزلو اشوفو الدبل طبعا الموضوع ما اخد معاهم كتير لانو رحمه كانت عارفه روحا دايره ياتو شكل ما شاورت صحبات الهنا و شغاليين واتس اب شديد اها اختارت ليها ويدينق رينق ب نفشه خياااال و حباسه طقم معاهو واختارت مع عماد دبله رجاليه فخمه و شالوهم و طلعو السوق العربي محلات النقش تقشو تاريخ العقد و اول حرفين من اسمهم و بعد داك سألهم اها نمشي وين نطه عبد الرحمن طوالي قال ليهو نمشي ألساحه صحبي مشا مع اهلو وقال عندهم شاورما رهيبه
(الولد طلع فجعان ) عماد قعد اضحك و قال ليه أبشر اصلو ما طلبتا والليله بجيب ليك الشاورما الفي المحل كلها وصلو نزلو و هن داخلين عماد لاقي اصحابو وقف معاهم و قال للجماعه ادخلو بلحقكم و دخلو قعدو قامت اسلام سالت رحمه قالت ليها انتي موش اخت عماد كان مفروض تجي معانا ؟ اي والله صح يا اسلام يا ربي مالا ! ما بعرف اساليهو كدي لكن بيني وبينك البت دي انا ما ارتحتا ليها حسيتا مفلهمه و بتعاين للناس بطرف عينا فأحسن ما جات رحمه سكتت شويه كده وقالت ليها يا أسلام ما تظلميها انحنا لسه ما اتعرفتا عليها امكن تطلع زوله عسوله متزكره سحر اول مره شفناها قايلينها برضو كده .. يا رحمه سحر اصلا عيونا الكبيره دي ماشاءالله و ملامح وشها بتدي الزول الانطباع دا وأنها خجوله شديد ما اتونست معانا افتكرناها كده لكن سحر طلع أطيب منها مافي .. اي يا اسلام ب الظبط كده دا كلامي امكن اخدتي انطباع غلط عنها..يا زوله الكلام دا مافي داعي ليهو زاتو المهم عماد زولو كويس( يا حليلا ختت افكار سودا في راس رحمه) عماد جا و قعد قصاد رحمه جنب عبد الرحمن قال ليهم اها تطلبو شنو و نادا الجرسون حال المنيو و قعدو اطلبو بعد ما جابو الطلبات آكلو و شربو العصير طلعو مشو الفاخر طلب ليهم عماد ايسكريم و رجعم البيت وكده الخميس انتهي لا لا دقيقه طبعا كان في السهره الصباحيه ب التلفون

موضوع: رد: رواية رحمة الجمعة أبريل 10, 2015 12:37 am

و بعد داك اتوالت الطلعات كل خميس في وجود عبدالرحمن او هبه الله بت عمتا رقيه ألجات قعدت عندهم في البيت عشان تقدر تزاكر لانو بيتم زحمه و مرات سهرات في البيت و مره الوقت سريع و جات امتحانات اسلام و امتحنت تمام الحمدلله (البت دوده قرايه كمان) و جا أطيب شهر في السنه و قررو اسافرو العمره اخر رمضان و فعلا تمو احرااتم و سافرو في امان الله اها قبال اسافرو كان عماد حول مبلغ محترم ل ريال سعودي واداهو رحمه في يدها قال ليها جيبي شيلتك بمزاجك( طبعا ما قلت ليكم اخر يوم جمعه قبال رمضان حصل شنو ) اصبرو اقول ليكم حصل شنو جا عماد قاااااااااااشر علي سنجه عشره ب الجلابيه السمنيه و الطاقيه و حالق جديد حاااااجه ما تخلص اها جا صلي مع ناس حاج محمد في الجامع الفي ود نباوي جنب البيت الكبير لانو ابو بكر كان عازمو هناك اها بعد داك رجعو و اتغدو و استاذن من حاج محمد اطلعو و فعلا ساق رحمه و عبد الرحمن و هبه الله و ولد ابوبكر الصغير محمد و مشو شارع النيل كمان الجو كان ظريييييف مغيم و هبوب حلوه و قعدو قعده حلوه كده و عماد جرا الكرسي وقعد جنب رحمه مطرف شويه كده و قال ليها اها الحمدلله اسي خلصتي السمستر و ان شاءالله النتيجه تطلع حلوه و انا صراحه مستعجل ما بقدر استني سنتين تاني رايك شنو نعمل العرس و انتي بعد داك تمي قرايتك عادي براحتك ما بمنعك ؟ اتبسمت كده و قالت ليهو شاور ابوي قال ليها انا داير اسمع منك انتي قالت ليهو انا ما عندي مشكله قال ليها موافقه يعني ابتسمت براحه كده وقالت ليهو اي موافقه بس قام علي حيلو و ب اعلي صوت عندو والله بحبك وانا اسعد زول في الدنيا و طبعا الشباب كلهم ضحكو قالت ليهو اقعد يا مجنون فرجتا فينا الناس قال ليها خليهم اعرفو انا مبسوط قدر شنو و مسك يدها كده قام عبدالرحمن كان مركز معاهم قال ليهو هوي يا عمده قامو ضحكو كلهم وعماد قال ليهو والله يا عبودي مرتي و بحقي اسي بسوقا وأخليكم هنا تضربكم المطره الشايلاه دي و قعدو اضحكو و تمو برنامجم و رجعو البيت و هناك عماد لاقي حاج محمد وكلمو ب الحاجه الاتفقو عليها وقال ليه ان شاءالله برد ليك بكره ولا بعدو ب الكتير و قام علي كده انتهي اليوم

موضوع: رد: رواية رحمة الجمعة أبريل 10, 2015 12:38 am

نخلي الجماعه ديل استفو للعمره و ارجع انا احكي ليكم شويه عن كم حدث فاتنا
(مويه رمضان وما ادراكما مويه رمضان ) طبعا كلنا عرفنا كريمه و اصلها الطيب و زوله بت أصول و اسم علي مسمي و لو كانت المرحومه ام رحمه عايشه ما كانت سوت ل رحمه زي ما سوت ليها كريمه ..سوت شنو هي اها سالتوني

موضوع: رد: رواية رحمة الجمعة أبريل 10, 2015 12:38 am

يلا المهم اي زول علق علي الحاجات انها رهيبه حتي اخوات سناء علقو وهي طبعا عجبوها الحاجات لكن ما علقت
(غاااايتو ثم غايتو من الحركات ) اها كمان قبال ارجعو عزمتم كريمه اول اسبوع فطور رمضان عندها و طبعا عزمت اخوات سناء برضو و وصت اكلمو ريم ست الحريم
يلا نمشي طوالي ل يوم العزومه عاد كريمه أبدعت و اتقطعت و طبعا رقيه جات شايله برضو ما خلت شي و ابتسام وأختها سهام و مرت ابوبكر برضو ما قصرت و طبعا زهور اعتزرت قالت دي قعده اسريه ما بتجي لكن رسلت ليهم قبال الفطور ما خلت حمام محشي ولا فطاير ولا غيرو
(قلنااااا قبيل زوله راقيه) يعني ب المختصر كانت وليمه تكفي قريه صغيره اها في المعمعه ديك جا داخل عبدالرحمن : امي ابوي قال ليك الرجال افطرو في الحوش برا افرشو ليهم السجاد الكبير قال ليك (ماشاءلله الحديقه ولا قصر بودين) و فعلا علي العصر كانت الحديقه اتفرشت و اتجهزت كلها و ما نسو جهزو طربيزه الحديقه بكراسيها كان جا زول كبير ما بقدر اقعد في الارض ولا شي و جهزو الصالون الكبير امكن المطره تصب ما معروف الظروف والسما شايله و جهزو المجلس ألجوا حق السفره للنسوان و بخروه ب الصندل حاجه كده عجيبه ؛ بعد انتهو قالت رقيه لكريمه ًابتسام سهام اطلعو اجهزو خلاص عشان تستقبلو الناس ديل ممكن اجو في اي لحظه انا و اخوي الكاشف ( مرت ابوبكر اخوها) بنتم التجهيزات بس نادي لي البنات ارصو ألجاتو دا عشان نقدمو مع الشاي و فعلا طلعو الجماعه اتجهزو و نادو اسلام و هبه و معاهم مها و فدوي صحبات رحمه كدي نخليهم و نمشي لعروسنا رايكم شنو

موضوع: رد: رواية رحمة الجمعة أبريل 10, 2015 12:39 am

رحمه ووووب من رحمه ماشاءلله تبارك الله قبل رمضان مشت ناس ماروكو عملت حمام مغربي و بعدا مشت شالت حلاوه و منها ما شافت الشارع تاني(اللون عاد بقي حاجه كده ما مفهومه دهب بس) لابسه ليها عبايه خليجيه اخضر روياااااان مشغوله كلها ب اللولي و ضربت ليك المنكير الفرينش و عملت ليك المكياج الماخمج ( لبست عدسات خضراء واتكحلت جوا العين تحت اخضر و برا العين كحل اسود ولاينر خفيف في طرف العين بس و عملت شدو خفيييييف ملخبط اخضر ب ابيض ب لمعه دهبي طلع ابداع و عملت ليك داك يا الروج الوردي و البلشر نفس الدرجه و ظبطت بدره خفيفه عشان الرطوبة و برمت الشعر من قدام كلو زي المشاط و رفعتو كلو فوق عشان ما اعرق ( طبعا مها ظبطت ليها استشوار فااااااهم اليوم كلو قيلت فيهو) ولبست شبشب زحاف فضي السيور حقتو لولي زي حق العبايه و الحجل طبعا أهما شي و لبست ليك حلق لولي طبقتين حلو وراقي و أسورتين لولي برضو طبعا مافي داعي السلسل لانو العبايه مشغوله كتير في الصدر و قالت كده اتبخبخت ب الفيرزاتشي كدي نخليها ونمشي نشوف ست البيت كريمه قشرت ب التوب العنابي و لبست غوايشا و حاجاتا وألحنه الساده مع بوخه الدخان غايتو مره سمحه سمحه سمحه تقول عروس ليها سنه ياداب و نزلت مع باقي نسوان الاهلً استقبلو العصابه(( النسابه قصدي

موضوع: رد: رواية رحمة الجمعة أبريل 10, 2015 12:39 am

عاد كل مظاهر البهرجه عند الناس ديل تياب عجيبه ما معروفه من وين زاتو و دهب ماشاءلله تبارك الله و نضافه لكن من غير ظرافه كدي خلونا منهم نمسك ام العريس غايتو سناء سنويه علي قول عماد مره صفرا فااااتح لونا و ملياااانه ماشاءلله لا طويله لا قصيره وعيونا عسلي فاتح خلقه الله مستحيل تكون عدسات طبعا

موضوع: رد: رواية رحمة الجمعة أبريل 10, 2015 12:40 am

السفره سفره النسوان ل حدن
(بتشديد الدال) شي كفته و شي حمام محشي و شي دجاج و بوفتيك و مندي و ملاح روب ابيض و ملاح تقليه و قراصه دمعه دجاج و عصيده و كسره و سيد السفره طبعا (الفول و الطعميه) و سلطات اشكال و اللوان و بطاطس و تلاته انواع شوربه و الفطاير اشكال و اللوان جبنه و زيتون و و و غايتو حاجات كده لامن ريقي نشف

موضوع: رد: رواية رحمة الجمعة أبريل 10, 2015 12:40 am

و قدر ما حلفو عليهم ابو اقعدو اها كمان كريمه ملت ليها عمود شكلو خرافي التقول عاملاهو براها شي كده غريب و ملتو ليك كل ما لذ وطاب و شيلتو للجماعه الماقدرو اجو و بكده انتهي اليوم و الجماعه يا حليلم مرقو الأكل وزعوه لناس الجامع و شالو ربطو في الأكياس و ركب عبد الرحمن مع عم اسماعيل و اتحركو وزعو لناس قسم الصافيه الجنبهم و للمساكين الجنب الطرمبه وما خلو زول .. اها الماقناهو انو نتيجه اسلام طلعت و جابت ٩١.٣٪ و رفضت تمام اعملو ليها حفله لانو عندها صحبتا شديد اتوفت قريب الله ارحما و طبعا قدمت صيدله الخرطوم و ان شاءالله حاشيلوها ما عندها مشكله طبعا و الما قلناهو برضو انو خاله عماد نادت كريمه علي حنبه وقالت ليها انا دايره اسلام لولدي هشام
(غايتو جنس مكابسه) طبعا كريمه كلمت حاج محمد و قال اصلا عارف انو اسلام حترفض لانها رافضه اي مبدأ عرس او خطوبه او حتي ارتباط قبل تتخرج من الجامعه طبعا كريمه نفسيا ارتاحت و بقلب قوي كلمت اسلام قالت ليها في زول أتقدم ليك طبعا اسلام ما خلتا زاتو تخلص كلاما قالت ليها انا كان ما استلمتا شهادتي ما حافكر في عرس و لسه مشواري طويل
((عاد ما اسلام كمان ))

موضوع: رد: رواية رحمة الجمعة أبريل 10, 2015 12:41 am

اها طبعا تاني يوم للعزومه ضربت ريم لكريمه بعد شالت التلفون من عماد و عزمتم عندها في البيت
(( وووب من ريم دايره تجيب لينا الهوي)) و طبعا كريمه خافت من القصه دي تعمل مشاكل لرحمه مع نسابتا لانو في النهايه ريم ضره سناء واصلا سنويه ما ناقصه براها مولعه من موضوع العرس لكن طبعا ريم أصرت و اتلايقت لامن اقنعتا
(غايتو ما معروف البت ظريفه و حبت ترد العزومه جد جد ولا ما دايره تفوت فرصه تمغص سناء) كريمه كلمت حاج محمد و هو طبعا راجل حكيم قال ليها خلي رحمه تكلم عماد وتكون واضحه معاهو و لو الحاجه دي ممكن تعمل ليها مشاكل لقدام تتصرف نعتزر ب اي سبب غايتو والله اسهلا اها كريمه نادت رحمه و كلمتا و فعلا رحمه جابت التلفون وضربت لعماد كلمتو و انبسط بسطه و قال ليها يا رحمه انا دايرك دايما كده(طبعا انا زاتي زيكم قايلاهو انبسط انو ريم عزمت نسابتو) اتاريهو بتكلم في شي تاني قال ليها دايرك دايما كده اي صغيره وكبيره تدخليني فيها وانا حاعمل معاك برضو كده ما داير اي شي ندسو من بعض وانا تاني كان ماشي الدكان بكلمك شكلها حركات اولاد غايتو في ولد اسي بكلم مرتو ب اي شي؟؟ كمان هي العويره فرحت تقول جاب ليها بي ام دبليو2014 و قالت ليهو اتفقنا و أوعدك تاني اي خطوه تكون معاي لكن ما قلت لي
رايك شنو في موضوع عزومه الخميس دا تفتكر خالتي سناء حتتضايق انا والله كلو ولا زعل
ا( كبكبه شديده) قال ليها لا لا ياخ معقوله بس يا زوله اسي امي بتكون عارفه طبعا و كملو حبكانات لغايه وكت السحور
اهما شي في الموضوع قال ليها انا حاكلم ابوي علي العرس آكون في عيد الضحيه طبعا خلاها عامله كده واااي يا بيبي ما بلحق اجهز الكلام دا شهرين و شويه مافي وكت قال ليها يا حبيبتي انا لو علي اسوقك كده ب توبك اللابساهو اسي دا ( شكلها رسلت ليهو صوره في الواتس اب) لالا ما جادي انت العرس دا قايلو كلفته لازم الحق اجهز : يا بت جااادي و بعدين اسي انتي دايره وكت لشنو؟ تجيبي شيلتك بكره بقطع ليك تسافري اي حته تحيبيها و تجي ولا خلي اخواتي اجيبوها ليك اصلهم مسافرين الاسبوع الجاي دبي اها تاني شنو دايره تتحبسي والله ما محتاجه ( عاد ما كضب) اها الحجز انتي ما ليك دخل بس توريني دايره ياتو صاله و ياتو فنان اها تاني شنو؟ عاد ما خلا ليها شي قالت ليه خلاص شاور ابوي و تمو حبكاناتم علي كده

موضوع: رد: رواية رحمة الجمعة أبريل 10, 2015 12:41 am

نمشي ل بيت ناس عماد قعد مع امو بتونس معاها و في نص الونسه هو الهطله كلما بعزومه ريم لناس رحمه المره دخلت في النار وطلعت و تنقنق قالت ليه يا ولد قلت العزومه متين قال ليها الخميس اها. طوالي رفعت التلفون ضربت لكريمه ، الوو كريمه ازيك يختي ان شاءالله كويسه و بعد ونسه النسوان اخبارك وأهلك و الحله و و وطبعا انحنا مسافرين الاسبوع الجاي دبي ان شاءالله و اصلي كنت جايطه و قلت خلاص اعزمكم يوم الخميس عندي في البيت ان شاءالله و النبي كلمي رقيه و ابتسام و سهام
((عاد لكن المره ما عملتا حامضه)) طبعا كريمه تبلع في ريقا ساي و في الاخير قررت تكلمت انهم معزومين عند ريم و الاحصل احصل قالت ليها ان شاءالله ربنا اكتب سلامتكم و اسهل ليكم السفر وطبعا انحنا بقينا اكتر من اهل يعني و اسي والله ريم ضربت عزمتنا الفطور يوم الخميس اها ديك بهناك عملت روحا طرشه عديييل آلو آلو يا بت يا رزان تعالي شوفي التلفون دا مالو زي القطع و قفلت الخط و قعدت تضحك غايتو ابليس خاف منها ما هينه الوليه دي

موضوع: رد: رواية رحمة الجمعة أبريل 10, 2015 12:42 am

اها يوم الخميس جا و حاج محمد قشر ب الجلابيه البيضا و العمه والشال هيبه و قار شديد و كريمه قشرت ب التوب البرتقالي المورد و اسلام لبست ليها فستان سمر دريس ملون و جكت طويل دانتيل بيجي و شبط احمر ب الفضي و حجبت طرحتا الحمرا ب البيجي حلات الدنيا عليها اما رحمه لبست برضو سمر دريس وردي فاااتح و تحت كلو ورود كحليه ب ابيض و لبست جكت بدله كحلي فيهو من النص كريستال صغنوني ب الفضي و رفعت شعرها تسريحه فوق وعملت خصل بسيطه و ختت طرحتا ًالمكياج بسيط كحل اسود برا العين و ماسكرا و غلوس وردي و لبست اكسسوار فضي و جزمه بكعب صغنوني ورديه ب فضي البتكون فاتحه اصبعين ب قدام وختت طرحته فوشى بي فضى غطت الشعر حلاته ما شاء الله
️ طبعا و عبودي قشر ب الجلابيه السكريه و طبعا ابتسام و سهام و رقيه قشرو و اتحركو علي الجماعه وصلو قبل الأذان ب ربع ساعه تغريبا قبلها غشو الفاخر شالو تحليه في يدهم اها استقبلم عماد و دخل حاج محمد و عبودي استقبال الرجال و دخل ال((سيدات و الآنسات )) استقبال النسوان طبعا ما اول مره اجو البيت القصر قصدي

موضوع: رد: رواية رحمة الجمعة أبريل 10, 2015 12:42 am

انتهت مراسم الفطور و توابعه و الجماعه رجعو قعدو و الخالات احاولو افتحو مواضيع من مافي و كلام عائم كده اها قامت اخيرا سنويه فتحت خشمها بتتكلم مع رحمه عماد قال لي حددتو العرس في عيد الضحيه طيعا الحته كلها صن صنت رحمه بصوت واطط كده قالت ليها اي يا خالتو عماد اتصل و قال لي انو حددو في العيد ،سناء لوت خشمه يمين وشمال الكلام ما عاجبا و قالت من طرف خشمها غايتو يا جيل الزمن دا صعبيين اي شي تحددو براكم وانحنا طراطير
( وب علي جابتا كبيره) رحمه سكتت وبقت تبلع في ريقا طوالي نطت عمتا رقيه والله يا حاجه سناء الكلام كلام ولدكم و الشوره شورت أبوكم و اكيد قايليبن عندك خبر ما كمان ام العريس لازم أشأ وروها و اسي ما فات شي اقعدي مع ولدك وأبوه اتشاورو و ادونا كلامكم (( عاد مره تمام رقيه عجبتني بركه ألعرفت ترد للمره المفتريه دي يخس)) طبعا الكلام ما عجب سناء طوالي اختها حاولت تصلح الموضوع هي و مالو الولد مستعجل وخير البر عاجله واصلو انحنا الكبار ديل علينا نتم ليهم بس و ندعي ربنا استر عليهم (( كسير تلج تقيل يا حليلا مضربه علي اسلام )) سناء دي جرت ليك فيها نور لامن عرفت الله حق طوالي قامت علي حليلا و استاذنت دقيقه اشوف العيال و جرت جري من الصاله(( كان اختها بتخاف منها كده اسي رحمه المسكينه تسوي شنو)) طوالي قامت كريمه قالت ب اسلام براحه كده رسلي ل ابوك قولي ليهو قوم ارح و فعلا دقايق المسج وصلت هناك لكن مع الجوطه حاج محمد ما انتبه ل التلفون .. سناء طبعا دايره ليها مشكله ب اي طريقه قامت قالت ل رحمه وري رزان مقاساتك عشان نجيب ليك الشيله بدل العواليق الفي السودان دا و منها تكون علي مستوي. اجي يا المستوي عاد المره نست عندها بنات رحمه براحه قالت ليها حاضر يا خالتو واصلت سناء الاستفزاز اها الدهب بجيب ليك بمزاجي ما تقولي مره كبيره ولا شي والله مره بتلبس ولا بتفهم في الدهب اكتر مني مافي

موضوع: رد: رواية رحمة الجمعة أبريل 10, 2015 12:42 am

طبعا طول الطريق زول فتح خشمو مافي مشو وصلو ابتسام و اختها و وصلو رقيه و رجعو البيت اول ما وصلو رحمه جرت فوق جري و اتفقعت بكي و اسلام تهدي فيها مافي فايده و كريمه طبعا قعدت تحت ورت حاج محمد الحصل لكن شويه صلحت الكلام كمان الراجل عيان ما ناقص زعل اطب من طولو قال ليها مشكله مافي يا كريمه و بتي انا متكفل بيها الحمدلله الخير في و انا بشتري راجل وعماد راجل تمتمت كريمه براحه ( اي راجل قدام امو طفل الله استر يا محمد علي رحمه ) طبعا ما سمعا اصلا و قال ليها انا ماشي الجامع و طلع علي كده اها بهناك رحمه بكت لامن نامت و اسلام نزلت كلمت امها ب حاله رحمه و قالت ليها انا خايفه عليها من الناس ديل شكلهم صعبيين شديد ؛ يا بتي دي قسمه اختك وخلاص ديل نسابتا تحترمهم وتحاول تتحاشهم بس وعماد زول كويس ما بتجيها العوجه ان شاءلله ( غايتو تحاول تطمن اسلام وهي ل روحا دايره الأطمنا) طبعا تلفون رحمه ضرب لامن فتر ( اسلام عملتو صامت عشان ما اصحي رحمه) ميه مكالمه من عماد طبعا شكلو عرف الحاصل و كمان مع تلفون رحمه المابترد عليهو النار ولعت فيهو و دور عربيتو علي الصافيه و الشارع كلو اضرب ل رحمه مافي رد اها قدام الباب قاعد في عربيتو ما عارف انزل ولا ارجع زول طقا الشباك اتاريهو حاج محمد راجع من الجامع مع التراويح شاف العربيه عرف عماد ؛ انزل انزل يا ولدي مالك برا منتظر رحمه؟ قال ليهو حاج محمد والله جننتكم الليله لكن عندي امانه لرحمه نسيت اديها ليها قبيل . يا ولدي انتي زول بيت انزل ما داير سبب و نزل عماد و طبعا اسلام حايمه في الحديقه تحت بتتكلم في التلفون ما قايله في زول بحي ولابسه ليها فستان بيت قصير كده وكت شافتو جرت جري شديد زي الشافت شيطان ومن الخلعه نطت لرحمه في السرير قومي قومي راجلك تحت ديك كمان قامت وشها زي دب الباندا ((البكي+مكياج)) شنو ؟؟ مالك ؛؛يا بت انزلي عماد تحت مستنيك؛ عماد!! جا متين و حرت الحمام غسلت وشها و نزلت (يا حليلا نفسها مرقت من اي شي )) سلمت عليه وأبوها طوالي قام مسك تلفونو و مرق من الصالون و عماد تنح وكت شاف وشها وارم و العيون جمر احمر والنخره محمره من البكي حبيبتي مالك ؟ سكتت ساي قال ليها يا رحمه انا عرفتا النقاش الحصل و انتي ما تزعلي من امي هي دايره ليك السمح و خاتاك زي بناتا و انا أوعدك ما احصل شي انتي ما راضيه عنو

موضوع: رد: رواية رحمة الجمعة أبريل 10, 2015 12:43 am

يوم الجمعه من الصباح ناس البيت مرقو مشوارم الاسري الا رحمه جوها صحباتا ناس الشله و قعدت توريهم في الشيله حاجات عجيبه سمردريسيس وتونكات و بناطلين و اسكيرتات قصيره و طويله و الجاكتات و شورتات و قمصان النوم عالم جميل و طقمت اللبسات ب اكسسوارتم و جابت المكياج الما خمج و العطور الباريسيه و ظبطت كم طقم شنطه ب شبط او شبشب باقي ليها التياب و الكارينات بس و قعدو كتبو الالوان و بعد صلاه العصر مرقو مع عبير مشو الفو علي مصممات التياب و اختارت ليها كم تصميم و بدو ليها فيهم و مشو ل خالتو ايمان في الرياض المحل حق ((توبك)) اشترو الشفونات الرهيبه و حجزت منها توب مشغول ب البيج و النبي والدهبي حاجه فخمه شديد غايتو اخدو لفتم و دخلو ماي بليس آكلو ًختمو المرقه ب توب غاليري حق الشباشب عزلت ليها شبشب برتقالي خطير ل توب شفون مورد اها دا كان برنامج البنات بقو لافين كلو يوم اتلمو بعد الجامعه عند رحمه و اطلعو اشوفو الحاجات الناقصة و لفو علي خبيرات التجميل و طبعا في الاخير حجزت عند حبيبتم غاده شرفي للزفاف و حجزت الرقيص عند هند حمدتو لزوم التغيير و طبعا خالتا ابتسام حجزت ليها قسمه لانو بينم معرفه و واسطه و كده و اها التعليمه من الاسبوع الجاي و رحمه طبعا بدت الحبسه و الدخان عاد الحطب بتاع الروف الرهيب حالتو رقيه و غسلتو ب القرنفل وختتو في الشمس و جابت مره قرت عليهو قران يعني البت ماشاءلله اتظبطت من اهلا غير العملتو امها كريمه ما قصرت و البنات جابو ليها كريم الدخان طبعا ب الدس لانو الودك ب زيت اللوز ظبطتو كريمه غايتو الحبسه عند رحمه و شغالين اظغطو فيها ب المدايد و العصاير و عصير البرتقال ثابت تلاته كبابي في اليوم و تجدع فيهو حبه فايتمين بي فوار غايتو ماشاءلله اها احكي ليكم البرنامج من الصباح بعد صلاه الفجر كريمه بتقعد رحمه في الدخان ساعه كامله و بعد داك تقوم تشرب المديده دااافيه و كبايه حليب و تمسح وشها و الف شعرا كعكات( طبعا ملان كركار) و ترقد تنوم اصحوها البنات العصر بعد ارجعو من الجامعه اتغدو واقعدو اتونسو لغايه ما التعليمه تبدأ واصلا رحمه عندها خلفيه كويسه بعد التعليمه كان عندها مشوار بسوقوها البنات تقضيها و ترجع البيت (طبعا عندها زمزميه زي حقت المدرسه الزمان ديك ملانه عصير برتقال ب فايتمين سي فوار تشيل و تشرب ) بعد العشا تقعد في الدخان و تطلع تأكل و تاخد ليها رقده و تقوم تمسح وشها و جسمها ب الخلطه السريه و تمسك التلفون تخلط عمده لغايه نص الليل و ترقد تنوم و هكذا ... طبعا فستان الزفاف صممتو ليها غاده شرفي زاتا و بتستلمو نهايه الشهر و فساتين الرقيص صممتم ليها مدام نهي ماهر الفي سوبا مع الاكسسوار حقهم والجدل و التياب حقت الرقيص (يعني مدام نهي مسكت ليها حاجات الرقيص من طقطق ل السلامو عليكم ) و عماد حجز طه سليمان الحفله و الاوفر نايت حجز فرقه هايبر باند و دي جي سام بتاع النادي الألماني داك(غايتو دا كان زمان علي ايامنا ما بعرفو لسه في

موضوع: رد: رواية رحمة الجمعة أبريل 10, 2015 12:43 am

اليوم خميس قبال العرس ب ٢١ يوم ب التمام والكمال بيت حاج محمد معلقين فيهو الأنوار و الزينه و البيت كلو واقف علي سن ورمح شغاليين تجهيزات لاستقبال اهل العريس الحاجيبو الشيله و الدهب و غيرو و الطباخيين شغاليين في الحوش الورا و كريمه وأقفه في التجهيزات و طبعا رقيه و ابتسام مشرفات مع الطباخيين والأكل و سهام و عزه مرت بابكر و معاهم زهور جارت كريمه و مرتين تانيات كده ما بعرفم تبع منو انظمو و اظبطو في البيت والترتيبات لاستقبال النسابه و فوق البنات موزعات جزو في اوضه رحمه و جزو مع اسلام البكوي في هدومو وال بستشور في شعرو و البضربو في المنكير و غايتو طبعا كل واحده مضربه ليها علي عريس من العيله المرطبه دي و طبعا رحمه من امس مشت بيت زينب عشان الناس الملقوفه البصرو الاقو العروس كان من اهل ناس رحمه ولا اهل العريس و شويه شويه البيت بدا اتملي نسوان والصاله الجوه اتملت خلاص نسوان الاهل و طبعا الصالون الكبير حق الرجال مبخرنو وقافلنو عشان اهل العريس و عشان الشفع ما اجوطوه و الحديقه ألبرا ختو فيها قعدات ظريفه للرجال البكونو سايقين العربات وكده و فصلوها بخيمه كده زي الصيوان ؛ تعالي يا بت يا هبه اجري نادي لي خالتك كريمه قولي ليها امي دايراك في محل التباخيين( دي رقيه طبعا) اها جات كريمه و رقيه طمنتا علي كل شي تمام و قالت ليها يلا اطلعي استحمي وتلبسي سريع الناس اسي بجو ؛ اقيف ليك في عرس هبويه ان شاءالله يا رقيه ؛ خلاص خلي البكش واتحركي سريع قبال الضيوف اجو ونادي لي اسلام دايراها ، نخلي رقيه مع المناقد و النيران والحلل والصحانه و نطلع مع كريمه استحمت سريع و لبست ليك ديك يا الكارينا المشمشيه و الاسكيرت نفس اللون و طبعا محننه ساده قالت تنقش للعرس لان الحنه ما بتطلع منها سريع ما دايره تتوسخ للعرس و طبعا نااايره ماشاءلله من قعده الدخان مع رحمه و لبست ليك التوب التايقر و كحلت عيونا و ختت ليها حته فازلين في شفايفا( طبعا هي عندها شفايف ما شلاليف ما تلخبتو عشان كده الفازلين بس كفايه) و كحلت حواجبا و لبست ليك الشبشب العالي مائل علي البرتقالي المطفي و لبست دهبا و اتبخبخت و عملت حته صندليه و خمره و طبعا مع التوب المبخر ب الصندل عرووووووس بس و مع نزلتا تسمع الزغاريت سريع سريع جرت تستقبل الضيوف بره وبقت سهام ابتسام وعده وكم مره سبقوها و رقيه طبعا مبخره ب ريحه المشاوي و جو داخلين اهل العريس غايتو خامييبيييين جنس خم حاجات عجيبه و غريبه و شي بترينات قزاز و شي احواط سمك غايتو ورونا القطع البحر منو

موضوع: رد: رواية رحمة الجمعة أبريل 10, 2015 12:43 am

اها دخلوهم الصالون و ختو الحاجات ماشاءلله ملت السفره الكبيره ديك و الباقي في الارض و شي في طرابيز الخدمه غايتو مهرجان بس و طبعا شنط العروس الاصلا شالوها من ناس رحمه قبال اسبوع و الناس دي كلها ملخومه و فاتحه خشمها في مظاهر البزخ دي شي تلاته طقوم كبيره و شي ١٢ غويشه و شي احفظ مالك و شي ختم و انسيالات خفيفه وحلقان طبعا تغليف تقييل تقول في زول حامد يدو اشيل شي ماشاءلله دا غير الكريمات كمان دا عالم تاني و الريح الباريسيه دي حاجات اول مره نشوفا شي فيرزاتشي وشي غوتشي و شي نينا ريتشي و كوكو شانيل و و و و صينيه تاني كبيره ملانه أرياح عربيه و عود و مباخر و مخمريات و مزيلات و طقوم الشاور باث و بودي شوب ماشاءلله غايتو دا طبعا كلو كًوم والريحه كًوم تاني

موضوع: رد: رواية رحمة الجمعة أبريل 10, 2015 12:44 am

تاني يوم رحمه عندها جلسه فيشل عند غاده شرفي مشت هي و زينب و مها و عبير و بعد انتهو غشو سولتير اتغدو و رجعو بيوتم رحمه طبعا رجعت بيتا و طلعت فوق طوالي تتفرج في الحاجات طبعا لسه مغلفات ما فتحوها قالو تجي تشوفهم و تصورهم و كده و بيني و بينكم هم زاتم كانو تعبانين ما فضو افتحو شي ،، و قعدت رحمه و اسلام وهبه و بت واحده قريبتم اسمها تولين اتونسو و انظرو في رحمه بس فجاه اسمعو ليك صوت جوطه تحت جرو تحت لقو كريمه تولول و حاج محمد ماسك صدرو و وفكو السكليب جري جري نقلوهو مستشفي البراحه سريع و هناك خموه دخلوه الطواريء وطبعا كريمه ورحمه و اسلام و هبه و عبدالرحمن و عم اسماعيل قاعدين في الانتظار جزو ابكي و جزو ادعي و بعد اقل من ربع ساعه جا داخل ابوبكر و ولد عمو معتز و حاولو اهدو الجماعه لكن مافي فايده بعد شويه جا طالع الدكتور عاد لكن الدكتور حلاه الدنيا عليهو و سال وين اهل المريض جو كلهم اقومو نهرم ابوبكر ومشا ل الدكتور خير يا دكتور انا اخوه ؛ ان شاءالله خير الحمدلله بسيطه الحاج جاتو جلطه والحمدلله لحقناهو لكن لازم نخليه شويه معانا عشان نتطمن عليهو و لازم يا جماعه تكونو رايقين و ممنوع الانفعال علي المريض من اي نوع غايتو دخلو شافو ابوهم و اطمنو عليهو شويه قلبهم برد الحمدلله و رجعو البيت قعدت كريمه و ابو بكر معاهو (الله اشفيه حاج محمد شكلو اجهد روحو الايام الفاتت دي

موضوع: رد: رواية رحمة الجمعة أبريل 10, 2015 12:44 am

طبعا البيت الكان امس ملان فرح و زغاريت الليله صااااني نفس ما فيهو واي زول ماسك ليهو مصحف و ادعي و يا حليلا رحمه دموعا ما وقفت شويه غايتو اسلام قويه وبعد اشويه الحرس ضرب و جات داخله حبوبتم و عمتم رقيه و عزه مره ابوبكر و عيالا و اصلا كانو مشو المستشفي اول اطمنو علي حاج محمد حتي جو اقعدو قبلم مع نتس رحمه يا حليلا اول ما شافت حبوبتا جرت مسكتا و تبكي حبوبه ابوي بسببي تعب ان شاءالله اموت انا ولا أمرض هو و تبكي و الناس دي كلها بكت معاها بس عمتا ادتم نهره واحده الناس سكتو ؛ رحمه استغفري اسي دا شنو ابوك كويس يا بت اسي جينا منو ما تعملي كده ادعي ربنا اشفيه ومالو المرض كفاره و من متين البني ادم سبب في قدر الله؟ طبعا كلاما حار و منطقي الناس دي سكتت من البكي و بقو ادعو لحاج محمد بعد اشويه تلفون رحمه ضرب ؛ آلو عزيز ابوي يا عزيز وقع ودوه المستشفي عندو جلطه و انفقعت بكي غايتو خلعت الولد بهناك يا حليلو قامت اسلام قلعت منها التلفون ؛ آلو عزوز كيفك حبيبي ما تتخلع والله ابوي كويس اسي جينا منو و الحمدلله الدكتور طمني عليهو و اهو دا معانا اني سيده و عمتو رقيه و عزه والله ابوي كويس ؛ اسلام ابوي معاهو منو ؛ معاهو عمو بكري ؛ طيب خلاص اقفلي بضرب عندو و هدي اختك دي الازمه ما تقوم عليها ساي؛ حاضر يلا ارجع لي بعد تضرب لعمو و سلم علي سحر مع السلامه و قفلت منو وقبلت علي رحمه ؛ حرام عليك ليه تخلعيه كده يا رحمه ابوي ما شفناهو كويس الحمدلله قومي غسلي وشك و صلي ركعتين احسن ليك ((عاقله البت دي)) اها بعد اشويه جات داخله كريمه و طمنت الناس و طلعت استحمت و نزلت تحت قالت ليهم الدكتور منعا تقعد قال مرافق واحد بس و الليله زياره مافي تاني نجي بكره العصر لكن اتكلمتا مع أبوكم الحمدلله كويس و ابوبكر معاهو و كمان ضرب ل صحبو دكتور جاي اسي يعني ما تخافو

موضوع: رد: رواية رحمة الجمعة أبريل 10, 2015 12:45 am

غايتو الاسبوع انتهي ب دراماتو كلها و طبعا عماد اليوم كلو يا في المستشفي يا في المستشفي

» رواية الصكوك
» رواية المسؤولية
» رواية ﺑﻨﺎﺕ ﺍﻟﻠﻴﻞ
» رواية ﺣﻮﺵ ﺑﻨﺎﺕ ﻭﺩ ﺍﻟﻌﻤﺪﺓ